SHBA, Komiteti i Gjyqësorit mbështet të nominuarën e Trump për Gjykatën Supreme

Komiteti i Gjyqësorit në Senatin amerikan ka votuar për dërgimin e emrit të Any Coney Barrett për votim në Senat. Barrett është e nominuara e Presidentit amerikan, Donald Trump, për gjyqtare në Gjykatën Supreme. Kreu i Komitetit të Gjyqësorit, republikani Lidsey Graham dhe 11 republikanë të tjerë votuan në favor, që nominimi i Barret të dërgohet në Senat për votim. Votimi për këtë gjë në Komitet ishte unanim, pasi dhjetë demokratët, që janë pjesë e këtij komiteti, bojkotuan seancën, duke thënë se nominimi i Barrett dhe seancat dëgjimore ishin "një proces mashtrues". Demokratët e kundërshtojnë fuqishëm nominimin e Barrett, si një gjyqtare që favorizohet nga konservatorët. Nëse nominimi i Barrett konfirmohet, ajo do të shërbejë përjetë në Gjykatën Supreme dhe në këtë institucion të drejtësisë në SHBA do të ndryshonte balanca, me një shumicë për konservatorët dhe kjo mund të afektojë drejtimet ideologjike të vendit për dekada me radhë. Demokratët nuk kanë shumë mundësi që të ndalojnë miratimin e Barrett nga Senati, ku republikanët kanë shumicën. Votimi i saj në Senat është caktuar më 26 tetor. Demokratët e cilësojnë nominimin e Barrett si jolegjitim, pasi ky proces po ndodh pak para zgjedhjeve presidenciale të 3 nëntorit, duke argumentuar se republikanët dëshirojnë që Barrett të bëhet gjyqtare e Supremes, në mënyrë që të mund të marrë pjesë në një rast të rëndësishëm që kjo gjykatë po trajton, e që ka të bëjë me reformat në sistemin shëndetësor. Nominimi i Barrett për Gjykatën Supreme ndodhi pas vdekjes së gjyqtares liberale, Ruth Bader Ginsburg.