Lajçak: Zgjidhja Kosovë- Serbi ka për të qenë e dhimbshme
Vuçiç: Hoti të mos thotë më "dy shtete", Kosova të ndryshojë qëndrim
Emisari i BE- së, Miroslav Lajçak, i cili ishte pjesëmarrës në panelin e Forumit të Sigurisë në Beograd, në fjalimin e tij tha se zgjidhja mes Kosovës dhe Serbisë do të jetë e dhimbshme.
"Tri qëllimet e procesit janë normalizimi i marrëdhënieve, zgjidhjet në pajtim me normat dhe vlerat europiane, të cilat e afrojnë rajonin më tepër me BE- në, si dhe kontribuojnë në stabilitetin rajonal. Zgjidhja do të jetë një kompromis i dhimbshëm, por ata që e bëjnë do të jenë në anën e duhur të historisë", tha diplomati sllovak. Në forumin virtual ka qenë pjesëmarrës edhe Kryeministri i Kosovës, Avdullah Hoti.
Presidenti i Serbisë është nxehur në diskutimin e së enjtes pasi Kryeministri i Kosovës, Avdullah Hoti, në mënyrë të përsëritur i është referuar Kosovës si shtet. Vuçiç ka kërkuar që Kryeministri i Kosovës të mos e përdorë më shprehjen "Kosova dhe Serbia janë dy shtete". "Hoti theksoi disa herë ‘ dy shtete, dy shtete, dy shtete, dy shtete’ në këtë takim, por edhe në takimet tjera. I them të mos e përdorë këtë mijëra herë. Nëse do afrim mes nesh, mos e thuaj këtë gjithmonë. Ne e dimë çfarë mendon", ka thënë Vuçiç në diskutimin e bërë në Forumin për Siguri në Beograd. "Dy shtete, dy shtete, dy shtete, dy shtete… Nuk ka dy shtete, ka një shtet që është anëtar i OKB- së në akordancë me Rezolutën 1244... Duhet ta respektojmë njëri- tjetrin. Kur flasim për zgjidhje kompromisi, nuk mund të flasim që Serbia ta njohë Kosovën dhe Kosova ta njohë Serbinë. Ju nuk njihni shtete. S'kemi nevojë për ketë. Kemi nevojë për kompromis", vazhdoi ai. Vuçiç kërkoi që
Prishtina ta ndryshojë qëndrimin e saj kur thotë se zgjidhja e vetme është që Serbia ta njohë Kosovën. Në Forumin e Sigurisë të mbajtur virtualisht, Vuçiç tha se Prishtina duhet ta kuptojë se është e nevojshme të zbatohen të gjitha marrëveshjet e nënshkruara, edhe ato në Bruksel. Sipas tij, vetëm në atë mënyrë mund të gjendet një zgjidhje kompromisi dhe nuk ka asnjë alternativë për kompromisin. Vuçiç pretendoi se duhet të kuptohet pozicioni i Beogradit dhe pozicioni i serbëve në Kosovë, por kjo nuk do të thotë se Serbia nuk është e gatshme për një zgjidhje kompromisi me Kosovën. Në panelin e këtij forumi po merr pjesë edhe Kryeministri Hoti dhe Emisari i BE- së, Miroslav Lajçak. Vuçiç po ashtu tha se "axhenda e brendshme është më e rëndësishme se çështjet strategjike. Nëse ju dëshironi të diskutoni substancialisht, ne jemi gati", tha ai duke iu drejtuar palës nga Kosova. Javën e ardhshme ministri i Jashtëm rus, Sergej Lavrov, do të udhëtojë në Serbi për një takim me Presidentin serb, takim përgjatë të cilit pritet të flitet për Kosovën.