Takim i papritur mes Thaçit, Veselit dhe Haradinajt
Mëngjesin e së enjtes, tri nga figurat kryesore të luftës dhe të pasluftës në Kosovë kanë mbajtur një takim të pazakontë. Presidenti Hashim Thaçi, kreu i PDK- së, Kadri Veseli dhe shefi i AAK- së, Ramush Haradinaj, flitet se kanë folur për tema të debatueshme në Kosovë, si Gjykata Speciale. Aludimet për këtë temë janë publikuar nga mediumi i AAK- së, "Aleanca Press", i cili ka dhënë detaje për takimin. Sipas tyre, takimi në mes të liderëve ka zgjatur më shumë se një orë e është zhvilluar në njërin nga restorantet e Prishtinës. Veç zhvillimeve politike, është folur edhe mbi aktakuzat e Prokurorisë Speciale, për të cilat Gjykata e Hagës duhet të deklarojë deri nesër, sipas afateve ligjore, nëse do të hapet një hetim apo pretendimet e prokurorisë do të rrëzohen. Zëdhënësi i PDK- së, Avni Bytyçi, e konfirmoi takimin, por tha në "Express" se nuk ka ndonjë lidhje me zhvillimet politike apo ndonjë temë tjetër në Kosovë. "Kryetari i PDK- së, z. Veseli, ka pasur një mëngjes me Presidentin dhe z. Haradinaj, por nuk lidhet me asnjë zhvillim politik apo temë tjetër në Kosovë", tha Bytyçi. Megjithatë nga AAK- ja janë treguar më të hapur publikisht për këtë takim. Deputeti i Kuvendit të Kosovës dhe kryetari i AAK- së në Pejë, Ali Berisha, tha për "Radio 1", se pjesëmarrësit në takim kanë diskutuar për zhvillimet politike e institucionale dhe nevojën e takimeve dhe konsultave me partnerë. "Ajo që tani për tani mund të them, është se takimi ka ndodhur. Zhvillimet politike dhe institucionale, nevoja për dinamika të reja, të mençura, normalisht që derivojnë edhe nevojën e takimeve dhe konsulta me aktorë dhe partnerë. Kryetari Haradinaj, si çdo herë, mbetet transparent dhe i përkushtuar ndaj zhvillimeve. Edhe takimi i sotëm i mëngjesit normalisht që është në një frymë të tillë. Korrekt, i arsyeshëm dhe logjik deri në fund", deklaroi Berisha.