BE sanksionon kryeagjentin rus për sulmin kibernetik ndaj Gjermanisë
Bashkimi Europian ka vendosur sanksione ndaj kreut të Agjencisë së Inteligjencës Ushtarake ruse ( GRU) dhe ndaj një zyrtari të kësaj agjencie, për përfshirjen e tyre në sulmin kibernetik të vitit 2015, ndaj Dhomës së Ulët të Parlamentit të Gjermanisë. Të enjten, në gazetën zyrtare të BE- së u publikuan emrat e personave dhe entiteteve që janë sanksionuar nga blloku dhe u tha se ata "janë përgjegjës për përfshirjen" në sulmin kibernetik ndaj sistemit të informacionit të Bundestagut. Ky sulm ndodhi në prill dhe maj të vitit 2015 dhe shkaktoi daljen jashtë funksionit të sistemeve operative për disa ditë dhe vjedhjen e një "sasie të konsiderueshme" së të dhënave. Po ashtu, e- mail- et e disa anëtarëve të parlamentit, përfshirë edhe atë të Kancelares Angela Merkel, ishin "prekur" nga ky sulm, sipas Këshillit të BEsë. Entiteti, të cilit i janë ngrirë asestet, është njësi brenda agjencisë GRU, zyrtarët e së cilës kanë marrë pjesë në sulmin kibernetik ndaj Bundestagut. Dy zyrtarëve të sanksionuar do t'u ngrijnë asetet dhe nuk do të mund të udhëtojnë në BE. Njëri prej tyre është Dmitry Badin, të cilin BE- ja e përshkruan si pjesë të ekipit që ka kryer sulmin kibernetik. Tjetri, Igor Kostyukov, i cili si kreu i GRU- së, është përgjegjës për sulmet kibernetike që ka kryer një njësit i agjencisë që ai udhëheq. BE- ja ka dalë në përfundimin se kjo njësi e GRU- së ka marrë pjesë edhe në tentimin për të hakuar rrjetin e Wi- Fi në Organizatën për Parandalimin e Armëve Kimike, në prill të vitit 2018. Rusia i ka hedhur poshtë akuzat.