Nga gropa e Sejdisë, te politika me “plehra”, debati i plotë Rama- Basha
Zhvillimi i aktivitetit partiak të PS- së dy ditë më parë në vendtrajtimin e mbetjeve në Elbasan është bërë objekt debati mes Kryeministrit Rama dhe kryedemokratit Lulzim Basha. Ishte kryedemokrati Basha i cili e komentoi në konferencën për shtyp takimin e zhvilluar në Elbasan, ku sipas tij, mesazhi ishte se Kryeministri e ka kthyer PS- në në kosh plehrash. Dhe më pas debati o spostua në rrjetet sociale.
DEBATI Edi Rama: Po, Lulzim, ka qenë PD- ja dhe e tërë politika e vjetër e mbledhur në formë malesh me plehra në mes të Tiranës, Elbasanit, Fierit e kudo, ku falë impianteve moderne që do të vazhdojmë të ndërtojmë, do mund të mblidhen njerëzit e të gjitha moshave për parqet e për aktivitete gjithfarë!
Lulzim Basha: Politika e vjetër ka erën e gropës së Hajdin Sejdisë ku nuk vure dorë 11 vjet si kryetar bashkie, ka fytyrën e zërin tënd që për 7 vjet e mbushe vendin me plehra dhe me inceneratorë që djegin vetëm milionat që ke zhvatur nga xhepat e shqiptarëve. Dita e llogarisë po afron!
Edi Rama: Ah Lul, të ka mbetur ora te gropa e Hajdin Saliut, po habitem si s’e kupton që sa më shumë sulmon impiantet moderne të mbetjeve, aq më shumë tregon se nuk ndahesh dot nga malet me plehra të Sali Hajdinit! Ta qaj hallin, je mes gropës së tij dhe grepit të Likes për tiganin e Monës!
Lulzim Basha: Kur për të mbrojtur korrupsionin tënd, mbyll PS- në në një vendgrumbullim plehrash, kuptohet se e ke një hall të madh. Por halli yt nuk ka asgjë të përbashkët me hallet e Shqipërisë. Në gropën e zezë ku je futur nuk do ta marrësh dot Shqipërinë me vete. Ora e gjykimit po afron!