Nga Kryesia tek ish- Grupi Parlamentar i PD, emrat që u shtyhet aprovimi dhe ata që u konfirmuan
REAGIMET PAS SHPALLJES SE LISTES ME 326 EMRA. FLASIN ANETARET E KOMISIONIT TE VLERESIMIT
Ish- Presidenti Bujar Nishani, i cili ishte pjesë e Komisionit të Vlerësimit të Kandidatëve të Partisë Demokratike për deputetë dhe kryetarë bashkish, deklaroi dje se procesi që mori jetë që në qershor në PD ishte i vërtetë dhe i bazuar në parime.
Në një intervistë për “News 24”, Nishani u shpreh se me mënyrën e re të përzgjedhjes së kandidatëve, kryedemokrati Lulzim Basha ka shpërndarë pushtet. “Transparenca dhe vërtetësia e procesit të rëndësishme, përveç asaj që nga lidershipi vendimmarrës është shpërndarë pushtet. Te metodika, platforma dhe doktrina që ka pasur kryesia e PD- së dhe Këshilli Kombëtar, nuk ka qenë proces i bazuar tek eliminimi i dikujt. Metodika ka qenë për të përzgjedhur më të mirët e mundshëm që të maksimalizojnë votën. Nëse kemi pasur një grupim njerëzish, janë zgjedhur 15 më të mirët e mundshëm. Kjo ka bërë që kriteret të jenë të pacenueshme. Ka pasur nga ata që vinin nga familje të të përndjekurve politikë, që ka qenë një nga shtyllat e politikës së PD- së. Ka qenë një proces përveçse i vërtetë dhe me një dozë solide sinqeriteti brenda tij”, tha Nishani. Anëtari i komisionit tha se faza e përzgjedhjes nga trupa me 5 anëtarë ka qenë një proces i vërtetë, që meritën nuk e ka vetëm te risia e përzgjedhjes së kandidatëve, por edhe te krijimi i raporteve me bazën për vendimmarrjen. “Ka qenë një proces i nevojshëm dhe i domosdoshëm, jo vetëm për të sjellë risi, por se si vendosen raportet e një partie të caktuar me bazën e saj, apo raportet për vendimmarrjen. Risia e këtij procesi nuk është vetëm te qenia e një komisoni ad hoc. Shpeshherë, lidershipi i partive të caktuara, përfshi dhe PD, është kritikuar nga opinioni për përqendrimin e kompetencave. Liderishipi i PD- së qartazi ka shpërndarë pushtet. Ka qenë një proces që ka marrë kohën e caktuar, por ka qenë i vërtetë. E rëndësishme sot në raportet e një mungese të thellë besimi mes institucioneve e qytetarëve. Nuk pretendojmë se ka qenë perfekt. Ajo që është e rëndësishme ka të bëjë me të vërtetën. Procesi ka qenë i vërtetë. Kur qytetarët shikojnë që procesi është i vërtetë, sjell një impakt pozitiv”, deklaroi
Nishani.
SKUALIFIKIMET Ndërkohë, anëtari tjetër i komisionit, Besnik Mustafaj, tregoi se përse nuk ishte në listën e të kualifikuarve ishdeputeti Halim Kosova. “Zoti Halim Kosova është tërhequr vetë, është dorëhequr përmes një mesazhi që i është dërguar kryetarit të partisë, andaj ai nuk është futur në listën tonë. Unë as do t’ju konfirmoj emër dhe as nuk ju mohoj. Nuk japim ne emra, është në tagrin e Kryesisë që të japë emrat. Është një proces me integritet”, tha Mustafaj. Por Mustafaj tregoi se si procedoi trupa me 5 anëtarë për ishdeputetët dhe anëtarët e kryesisë, për të cilët nuk ndanin të njëjtin mendim. “Procesi besoj se është me integritet, i përzgjedhjes së kandidatëve. Unë dhe personat e tjerë që merren me zgjedhjen e kandidatëve, nuk kemi pasur asnjë presion nga Partia Demokratike. Jam nisur nga parimi që kemi listë sa më përfaqësuese të PD- së. U hodhën themelet e një tradite, që në legjislaturën tjetër të jetë akoma më e mirë. Në rastet kur nuk ka pasur konsensus mes anëtarëve për të kualifikuar apo për të shtyrë kualifikimin e një kandidati të posaçëm është përdorur vota e fshehtë”, u shpreh Mustafaj.