E rrallë në veting, KPA rikthen në punë gjyqtarin
Fuat Vjerdha u rikthye në detyrë me vendim unanim të KPA, shënohet rasti i parë i prishjes së një vendimi shkarkimi
Fuat Vjerdha është i pari gjyqtar i shkarkuar nga Komisioni i Pavarur i Kualifikimit, i cili rikthehet në detyrë me vendim të Kolegjit të Posaçëm të Apelimit.
Dje, trupa e kryesuar nga Ardian Hajdari, me relatore Ina Ramën dhe anëtarë Albana Shtyllën, Natasha Mulajn dhe Rezarta Schuetzin, njoftoi se kishte prishur vendimin e Komisionit të Pavarur të Kualifikimit, i cili e shkarkonte Vjerdhën për “cenim të besimit të publikut te drejtësia”. Fuat Vjerdha e ka nisur karrierën në sistemin gjyqësor në vitin 1994 dhe në nisje të procesit të vetingut ushtronte detyrën e kryetarit të Gjykatës së Apelit të Shkodrës. Vjerdha iu nënshtrua një procesi të gjatë vetingu në KPK. Ndaj tij u zhvilluan dy seanca dëgjimore dhe ai u pyet kryesisht mbi pasurinë dhe vendimmarrjen në disa raste. Procesi ndaj tij në KPK u krye nga një trupë e kryesuar nga Olsi Komici, me relator Lulzim Hamitajn dhe anëtare Pamela Qirkon. Vendimi i KPK- së për shkarkimin e Vjerdhës bazohej kryesisht në vendimmarrjen e tij dhe dy kolegëve të Apelit të Shkodrës për të lehtësuar dënimin e Sokol Mjacajt, i akuzuar bashkë me dy persona të tjerë për vrasjen e një 13- vjeçari në vitin 2010. Mjacaj, që po ashtu ishte vetëm 13 vjeç në këtë kohë, u dënua fillimisht me 10 vjet burg, por në Apel ai u dënua vetëm për moskallëzim krimi me 4 vjet burg. Pas lirimit, Mjacaj vrau dy turistë dhe zbutja e dënimit të tij në Apel u kthye në debat publik. Vjerdha këmbënguli në seancë dëgjimore se kishte krijuar bindjen që Mjacaj nuk kishte marrë pjesë në vrasje. Në mbrojtjen e tij, Vjerdha kishte këmbëngulur se vendimet kishin qenë të bazuara në ligj dhe në bindjen e brendshme, ndërsa kundërshtoi akuzat dhe denoncimet që iu bënë.
VENDIMI I KPK Me 10 qershor të vitit 2019, Komisioni i Pavarur i Kualifikimit shkarkoi nga detyra kreun e Gjykatës së Apelit Shkodër, Fuat Vjerdhën. Sipas vendimit të zbardhur, Komisioni i Pavarur i Kualifikimit ka arritur në përfundimin se Vjerdha ka cenuar besimin e publikut te sistemi i drejtësisë për kriterin e profesionalizimit dhe pasurisë, çfarë ka sjellë shkarkimin e tij nga detyra. Trupa gjykuese e KPK- së e përbërë nga Olsi Komici kryesues, Lulzim Hamitaj relator dhe Pamela Qirko anëtare evidentojnë në vendimin e zbardhur një sërë problematikash për këto dy kritere. Në vendimin e zbardhur thuhet se lidhur me aftësitë profesionale të gjyqtarit Fuat Vjerdha janë konstatuar mangësi profesionale të përsëritura, shkelje procedurale dhe gjykim i dobët, për shkak të të cilave ai nuk arrin nivelin kualifikues. “Nga vlerësimi tërësor dhe kryesisht për sa i takon aspektit etiko- profesional, rezulton se subjekti i rivlerësimit ka cenuar besimin e publikut te sistemi i drejtësisë…”, citohet në vendimin e KPK- së.”
BIRN