PD vlerëson Metën, PS: President “hileqar”
Balla: “Mori kohë për të vonuar Parlamentin, kemi mundësi për ta kaluar”. Bardhi: “Të merret urgjent opinioni i ‘ Venecias’”
Reagimet pas dekretit të Presidentit Meta për të kthyer në Kuvend për rishqyrtim ndryshimet që iu bën Kodit Zgjedhor, është pritur në mënyra të ndryshme nga opozita dhe maxhoranca.
Për socialistët, ky akt i Metës ishte hileqar, pasi mori kohën deri në limite për ta vonuar sa më shumë procedurën parlamentare. Ndërsa për demokratët dhe partitë e tjera në opozitë ky veprim i Metës është moment për të reflektuar dhe apelojnë që të merret sa më shpejt opinioni i Komisionit të Venecias.
BALLA
Nga Elbasani, kreu i grupit parlamentar të PS- së, Taulant Balla u shpreh se dekreti i Metës në afatin fundor që i lejonte ligji për t’u shprehur me dekret për Kodin Zgjedhor, është një tentativë e tij për ta vonuar sa më shumë futjen në fuqi të tij. Sipas numrit dy të PSsë kjo sjellje e Metës është hileqare, duke e cilësuar atë si “mistrec”. Por në fjalën e tij Taulant Balla siguroi se është koha e mjaftueshme që procedura parlamentare të rrezojë dekretin e Metës dhe ta votojë që më pas ai të futet në fuqi. “Me vjen keq që Presidenti i Republikës mori kohën për të vonuar procedurat parlamentare. Ne nuk kemi asnjë ditë për të humbur. Kodi Zgjedhor është një kod i plotë i cili ka transferuar qasjen dhe i ka dhënë një fuqi me të madhe popullit të zgjedhë jo vetëm kryetarin dhe partinë politike që do, por të zgjedhe edhe listën e kandidatëve që do. Çdo vonesë që vjen nga një President “mistrec” dhe “hileqar”, unë mendoj që i kemi të gjitha mundësitë ta kalojmë. Reforma zgjedhore është sukses. Tani qytetarët nuk do të kenë një votë por dy vota, meqë këtë e donte dhe Presidenti”, u shpreh Taulant Balla.
BARDHI
Për të përcjell[ reagimin zyrtar të Opozitës së Bashkuar, doli sekretari i PD- së, Gazment Bardhi, i cili tha se ky është një shans i dytë që i jepet maxhorancës për të reflektuar. “Opozita e bashkuar përshëndet aktin e Presidentit për kthimin për rishqyrtim Kuvendit të Shqipërisë për Kodin Zgjedhor dhe kërkimin e marrjes së opinionit urgjent nga Komisioni i Venecias. E vlerësojmë si hap dhe mundësi e rëndësishme, në drejtim të rikthimit të paqes publike dhe klimës zgjedhore në vend. Miratimi i Kodit Zgjedhor, si produkt i marrëveshjes së 14 janarit dhe konkluduar me marrëveshjen e 5 qershorit, ishte një arritje madhore e klasës politike në vend, mbështetur fuqimisht nga faktori ndërkombëtar. Hapësira që Presidenti i Republikës ka dhënë, nëpërmjet rikthimit për shqyrtim në Kuvend, e shoqëruar me kërkesën për marrjen e opinionit urgjent nga Komisioni i Venecias, është jo vetëm një akt i pjekur në vazhdën e traditës politike dhe parlamentare 30 vjeçare, por edhe një mundësi e mirë për të rikthyer gjithë përfshirjen dhe konsensusin politik, si dhe gjetjen e zgjidhjeve teknike për eliminimin e deformimeve të rënda kushtetuese që mbartin ndryshimet e fundit në Kodin Zgjedhor. Zgjedhjet e lira, të ndershme e të qeta, janë shërbimi më i mirë që qeveria e ka për detyrim t’ia ofrojë shoqërisë shqiptare edhe si zgjidhje për situatën e rëndë politike, ekonomike dhe sociale që vendi po kalon dhe mbi të gjitha, si rruga e vetme drejt së ardhmes europiane të vendit”, deklaroi dje sekretari i përgjithshëm i PD- së, Gazment Bardhi.