Berati dhe Shqipëria nuk kanë nevojë për eksperimente, por kanë nevojë të ecin përpara. Ajo që mund të them, është që sot jam me zotin Klosi, por do vazhdoj të jem edhe në të ardhmen. Shqipëria nuk ka nevojë për njerëz që janë vasalë të dikujt tjetër

Pak muaj para zgjedhjeve parlamentare, “lufta” politike ka filluar të ashpërsohet.

Ditën e djeshme, PS prezantoi ish-ministrin e LSI-së, Nasip Naçon, si një prurje të re që do të mbështesë Partinë Socialiste në zgjedhjet e 25 prillit. Në ditën që në qytetin e Beratit festohej Dita e Ujit të Bekuar, ministri i Turizmit dhe drejtuesi politik i PS-së në Berat, Blendi Klosi, u shfaq para gazetarëve në krah me Nasip Naçon, ish-deputetin e LSI-së. I mbushur me emocione dhe fjalëpakë, Naço tha se në zgjedhjet e ardhshme ai do të mbështesë të majtën progresive dhe se do të jetë në krah të ministrit të Turizmit, Blendi Klosi. “Sot është një ditë e bekuar, jam në krah të ministrit Klosi. Unë do të doja që sot në këtë ditë të shprehja qëndrimin tim, që do vazhdoj të jem në krah të së majtës progresive, e cila i ka dhënë tonin Shqipërisë. Berati dhe Shqipëria nuk kanë nevojë për eksperimente, por kanë nevojë të ecin përpara. Ajo që mund të them, është që sot jam me zotin Klosi, por do vazhdoj të jem edhe në të ardhmen. Shqipëria nuk ka nevojë për njerëz që janë vasalë të dikujt tjetër. Kanë nevojë të përfaqësoj një pjesë të elektoratit edhe në Qarkun e Beratit, që është i papërfaqësuar. Votat e tyre të shkojnë në koalicion me të majtën progresiste”, tha Naço. Ndërsa për ministrin Klosi, afrimi i ish-deputetit të LSI-së do të përmbushë objektivin e PS-së për 5 mandate në Qarkun e Beratit në zgjedhjet e 25 prillit. “Për Beratin, kjo është një datë e shënuar. Bashkë me mesazhin për një ditë të bukur për Beratin, edhe mikpritja e kolegëve tanë, të cilët mbështesin

Ramën Kryeministër dhe fitoren e PS-së në 25 prill, është e mirëpritur. Berati turistik duhet të rivotojë PS-në. Me afrimin e kolegëve të çmuar si Nasip Naço, ne do arrijmë objektivin për 5 mandate në Berat. E rëndësishme është që PS të vazhdojë projektet në Berat”, tha Klosi. E SHKUARA E NAÇOS

Në legjislaturën XVIII, Naço u zgjodh deputet i Qarkut të Beratit për Grupin Parlamentar të LSI-së dhe në periudhën 2009–2011 ushtroi detyrën e zëvendëskryetarit të Kuvendit të Shqipërisë. Në vitet 2011–2012, ai ushtroi detyrën e ministrit të Ekonomisë, Tregtisë dhe Energjetikës. Më pas u rizgjodh zëvendëskryetar i Kuvendit të Shqipërisë, në korrik 2012. Në vitin 2013, Naço u zgjodh ministër i Drejtësisë. Ndërkohë, më herët, ai ka ushtruar disa detyra të shtetërore si: prokuror në Prokurorinë e Rrethit Berat, drejtor i Shërbimit Informativ në Ministrinë e Brendshme, prokuror pranë zyrës së Prokurorit të Përgjithshëm, shef sektori kundër Akteve Terroriste dhe Krimeve kundër Personit pranë Zyrës së Prokurorit të Përgjithshëm, drejtues i Prokurorisë së Rrethit Gjyqësor Durrës etj.