Nga Rama te Spiropali, PD çon në SPAK 16 funksionarë të PS

Bardhi: Përdorën në mënyrë të paligjshme funksionin për zgjedhje

Dy javë pasi ka hyrë në fuqi akti i KQZ-së për veprimtaritë e palejuara të qeverisë dhe pushtetit lokal 4 muaj para zgjedhjeve, PD ka paditur në SPAK Kryeministrin Rama dhe 15 funksionarë të tjerë për përdorim të paligjshëm të funksionit për zgjedhje. Në kallëzimin e firmosur nga sekretari i përgjithshëm i PD-së, Gazment Bardhi, i depozituar ditën e martë në Prokurorinë e Posaçme, janë 16 persona që kallëzohen se po përdorin funksionin publik për interes elektoral. “PD-ja i ka kallëzuar të gjithë për 2 vepra penale: ‘Shpërdorim detyre’ dhe ‘Përdorimi i funksionit publik për veprimtari politike ose zgjedhore’. Disa nga shembujt e sjellë janë përfshirja e Edi Ramës, Elisa Spiropalit, Taulant Ballës, Belinda Ballukut, Erion Veliajt, Arben Ahmetajt etj. në aktivitete që kanë të bëjnë kryesisht me rindërtimin pas tërmetit, ku përdoren burime dhe para publike, si dhe me dhënien e certifikatave të legalizimit apo investimeve të tjera publike. Publikimi i këtyre aktiviteteve është i ndaluar edhe me vendim të KQZ-së, bazuar në ligjin e miratuar sipas marrëveshjes së qershorit të kaluar”, njofton zyra e medias e PD-së. Pak kohë më parë, PDja dorëzoi një kallëzim të veçantë në SPAK për ish-ministren e Mbrojtjes dhe aktualisht ministren për Europën, Olta Xhaçkën, e cila sipas denoncimeve të PD-së, ka përdorur disa herë helikopterin ushtarak për qëllime elektorale. Në vijim selia blu thekson se pavarësisht se në Prokurorinë e Posaçme qëndrojnë disa padi të depozituara nga Partia Demokratike, deri tani nuk ka asnjë reagim nga drejtësia e re. “Ky kallëzim apo kallëzimet e ngjashme me të janë rasti ideal që edhe SPAK-u të sprovohet në sytë e mbarë opinionit publik shqiptar dhe ndërkombëtar dhe të tregojë me vepra se organet ligjzbatuese shqiptare do të vendosin përpara përgjegjësive çdo shkelës të ligjit, pavarësisht nëse është i pasur apo i veshur me pushtet”, theksohet në kallëzimin e PD-së.