Partizani s’ndalet, firmos dhe Valentino Murataj
Partizani po marshon në merkato. Të kuqtë duan të përforcohen sa më shumë dhe sa më shpejt në këtë merkato janari, që në njëfarë mënyre edhe të kompensojnë kohën e humbur gjatë verës, kur nuk patën mundësinë të përforcoheshin. Pas Stenio Zhuniorit, firma e radhës është e Valentino Muratajt. Mesfushori i Bylisit do të jetë përforcimi më i fundit i "demave të kuq", që ia shton shumë vlerat repartit të mesfushës. Gjatë ditës së djeshme janë zhvilluar bisedimet mes klubit dhe lojtarit, të cilat janë konkretizuar me sukses. Burime konfirmojnë për "Panorama Sport" se gjithçka është mbyllur dhe pritet vetëm zyrtarizimi nga klubi i Partizanit. Murataj i është bashkuar Bylisit në verën e vitit 2017 nga skuadra e Dinamos. Mesfushori kishte kontratë me ballshiotët dhe Partizanit iu desh të paguante për kartonin e tij. "Demat" kanë paguar 50 mijë euro për shërbimet e Muratajt, si dhe kanë 10% të kartonit në rast të një shitjeje të ardhshme. Këto kanë qenë edhe kushtet për të cilat kanë rënë dakord dy drejtuesit e klubeve, që në fund kanë shtrënguar duart. Mesfushori po bënte një sezon tepër të mirë për Bylisin. Në këtë edicion futbollistik, 24-vjeçari i luajti të 12-ta ndeshjet e Superiores për ekipin ballshiot, madje edhe ka shënuar një gol dhe ka asistuar një tjetër. Murataj ka provuar të mbajë edhe shiritin e kapitenit te Bylisi, duke treguar karakter lideri, edhe pse në një moshë të re. Murataj është një produkt i akademisë së Partizanit. Në sezonin 2014-'15, mesfushori është aktivizuar për Partizanin U-19 dhe më pas karriera e tij ka qenë vetëm me ekipet A. Pasi luajti dy sezone me Dinamon, Murataj iu bashkua Bylisit verën e vitit 2017, ku për tri sezone e gjysmë tregoi të gjitha kualitetet e tij, duke qenë një ndër më të mirët tek ekipi ballshiot.