Dunga kërkon letrat, Vllaznia afron Avdijajn
Ismael Dunga, sulmuesi nga Kenia, i cili në momentin më të mirë të tij u larguar nga ekipi për arsye të marrjes së pasaportës, ka gjasa të mos kthehet më në Shkodër. Nga burime pranë klubit mësohet se ai mund t'i kërkojë klubit lejekalimin e të mos kthehet më pranë Vllaznisë. Lojtari kishte probleme me skadimin e pasaportës së tij dhe u la që të largohej drejt Kenias për një periudhë dyjavore. "Panorama Sport" ka mësuar nga burime pranë klubit se Dunga po kërkon tani që të lihet i lirë dhe me shumë gjasa mund të mos kthehet më në Shkodër. Nisur nga kjo situatë, drejtuesit e klubit po kërkojnë lojtarë për t'u forcuar në këto momente, kryesisht në fazën sulmuese. Si një mundësi është huazimi nga Tirana i sulmuesit Albion Avdijaj.
Albion Avdijaj - Vllaznisë i ka ecur me rezervat e Tiranës. Precedenti Isamel Dunga, që në dallim nga paraqitje me bardheblutë shkëlqeu në Shkodër, shpresohet të përsëritet edhe me sulmuesin tjetër të Tiranës, Albion Avdijaj. 26vjeçari ka mbërritur dje në Shkodër, ku ka zhvilluar edhe seancën e parë stërvitore në urdhrat e trajnerit Brdariç, kështu që Avdijaj pritet të firmosë për Vllazninë. Sulmuesi i Tiranës duket se e ka gjetur marrëveshjen me klubin bardheblu për kontratën dhe në këto momente po negocion me drejtuesit shkodranë për të gjetur një akord. Gjasat janë që Avdijaj të bëhet afrimi më i ri për Vllazninë, por mbetet për t'u parë nëse do të jetë në formë huazimi në Shkodër apo vjen si futbollist i lirë. Lojtari i ardhur me bujë te Tirana në verën e vitit të kaluar doli shumë shpejt jashtë planeve të ish-trajnerit Egbo, duke luajtur më tepër me ekipin U-21 të klubit bardheblu. Drejtuesit negociuan prishjen e kontratës me Avdijajn, por lojtari ishte i vendosur për të vazhduar bashkëpunimin.