Shqipëria nën ujë, Meta thirrje Prokurorisë për hetime, Rama ironi me opozitën
“I kërkoj publikisht Prokurorisë të jetë e vëmendshme për çdo rast të shpërdorimit të detyrës nga funksionarët publikë”
Të gjitha strukturat shtetërore të ngarkuara me përgjegjësi për menaxhimin e situatës duhet të veprojnë pa zvarritje, pasi çdo papërgjegjshmëri është e dënueshme ligjërisht ndaj ftoj prokurorinë që të jetë e vëmendshme ndaj çdo neglizhence
Presidenti i Republikës, Ilir Meta, ka ashpërsuar tonet për mungesën e reagimit të institucioneve në lidhje me situatën e krijuar nga përmbytjet në shumë qarqe të vendit. Nëpërmjet një deklarate për shtyp, Meta ka kërkuar që shteti të ngrihet në këmbë për të garantuar sigurinë e jetës dhe pronës, ndërsa ka akuzuar qeverinë që nuk mori masat e nevojshme për përballimin e situatës edhe pas paralajmërimit nga IGJEUM. Kreu i shtetit ka thënë se kjo “është papërgjegjshmëri ekstreme dhe e dënueshme ligjërisht”, ndërsa ka kërkuar nga institucionet shtetërore edhe drejtuesit lokalë që të jenë pranë çdo problemi të krijuar duke i kërkuar publikisht Prokurorisë që të jetë e vëmendshme ndaj rasteve të shpërdorimit të detyrës.
DEKLARATA E PRESIDENTIT META Është papërgjegjshmëri ekstreme dhe e dënueshme ligjërisht, që alarmi i Institutit të Gjeoshkencës, Energjisë, Ujit dhe Mjedisit mbi rrezikun e përmbytjeve në vend, me pasoja tepër të rënda, nuk po merret seriozisht nga institucionet shtetërore, duke vënë në rrezik jetën, shëndetin dhe pronat e mijëra qytetarëve në mbarë vendin, qartësisht të braktisur në mëshirë të fatit. Ende sot, asnjë zyrtar i lartë shtetëror nuk ka komunikuar zyrtarisht me popullatën për ta informuar mbi masat e marra për përballimin e kësaj situate të vështirë.
Qytetarët meritojnë të informohen me transparencë dhe këtij detyrimi kushtetues nuk mund t’i shmanget askush! Sipas të dhënave nga terreni, me qindra hektarë tokë rezultojnë të përmbytura në qarqet Tiranë, Shkodër, Lezhë, Fier, Gjirokastër, Vlorë, në Krujë e Sarandë, dhe vetëm në Durrës raportohen nga autoritetet mbi 410 hektar tokë nën ujë. Probleme serioze mësohet të ketë veçanërisht në Shkodër, Lezhë, por dhe në Vlorë, ku për orë të tëra disa segmente të rëndësishme rrugore, edhe lagje brenda qyteteve, kanë qenë nën pushtetin e ujit, duke nxjerrë në pah abuzimet korruptive, të reflektuara në cilësinë e dobët të investimeve, kryesisht në rrjetet kulluese.
Problematika të mëdha janë konstatuar lidhur me mospastrimin e kanaleve kulluese të Ujërave të Larta, si dhe nga mosvënia në punë me kapacitet të plotë të të gjithë hidrovorëve. Në akset kryesore rrugore raportohen rrëshqitje dherash, ndërkohë që prezenca e kompanive me detyrime kontraktore me Autoritetin Rrugor Shqiptar lë për të dëshiruar. Në Veri të vendit, si rezultat i reshjeve të dëborës, janë bllokuar disa segmente rrugore, si BogTheth dhe ajo e Malit të Shoshit, ku trashësia e dëborës kalon mbi 120 cm dhe ku nuk garantohet kalueshmëria dhe qarkullimi normal i mjeteve dhe njerëzve. Asnjë masë në ndihmë të banorëve të këtyre zonave, tashmë të bllokuara, nuk është marrë paraprakisht. Në kushtet kur sipas të gjitha parashikimeve situata pritet të përkeqësohet, i kërkoj me forcë qeverisë, ministrive përgjegjëse, prefekturave dhe bashkive, të marrin menjëherë dhe pa vonesa të justifikuara të gjitha masat e duhura për të garantuar mbrojtjen e jetës, shëndetit dhe pronave të qytetarëve. U kujtoj ministrive, që kanë detyrime kushtetuese dhe ligjore për mbrojtjen civile sipas fushave të përgjegjësive, të dëshmojnë përgjegjshmëri dhe angazhim konkret në këtë drejtim. U bëj thirrje prefektëve dhe kryetarëve të bashkive në zonat me rrezik të shtuar, të mbledhin menjëherë Komisionet e Mbrojtjes Civile dhe të angazhojnë në terren të gjitha strukturat operacionale për minimizimin e pasojave të përmbytjeve. Autoriteti Rrugor Shqiptar në këtë situatë duhet të jetë më kërkues ndaj kompanive që kanë detyrime për mirëmbajtjen dhe mirëfunksionimin e akseve rrugore. Të gjitha strukturat shtetërore të ngarkuara me përgjegjësi për menaxhimin e situatës duhet të veprojnë pa zvarritje. I kërkoj publikisht Prokurorisë të jetë e vëmendshme për çdo rast të shpërdorimit të detyrës nga funksionarët publikë. Jeta, shëndeti dhe pronat e qytetarëve, duke pasur në konsideratë edhe pasojat e rënda të pandemisë COVID-19 duhet të jenë prioritet absolut.