Mitsotakis, drekë informale në shtëpinëe tij, Rama me mesazh nga Presidenti Erdogan
Greqia do të ndihmojë Shqipërinë me 1500 vaksina anti-COVID, palët folën për dosjen e detit, por dhe Traktatin e ri të Miqësisë
Pas Ankarasë, Kryeministri Rama uli avionin e tij qeveritar “Albania” në aeroportin e Athinës për të kaluar disa orë nën miqësinë greke, ku temat e diskutimeve kanë qenë të shumta.
Tema më e nxehtë mes dy vendeve është ajo e delimitimit të kufirit detar, për të cilin si Rama ashtu dhe Mitsotakis ranë dakord që t’i drejtohen Gjykatës Ndërkombëtare të Hagës. Duket se këtij qëllimi i ka shërbyer dhe takimi i Kryeministrit Rama me ministrin e Jashtëm grek, Nikos Dendias. Takimi ka zgjatur tri orë më shumë se planifikimi, ndërsa duket se ministri Dendias e ka vlerësuar si një takim informal, pasi përveç një “Twitter”-i në faqen e Ministrisë së Jashtme greke, nuk ka asnjë njoftim. Pas takimit me Dendias, Kryeministri Rama është pritur nga homologu i tij grek, Mitsotakis, në shtëpinë e tij. Duket se edhe kjo drekë pune është zhvilluar larg ambienteve zyrtare, siç zakonisht ndodh. Ndërsa Mitsotakis shoqërohej në këtë drekë nga ministri i Jashtëm Dendias dhe këshilltaren diplomatike të tij, ambasadoren Eleni Sourani, e cila ka shërbyer në Tiranë, Edi Rama nuk kishte as ministren e Jashtme dhe as ndonjë këshilltar, ndërkohë që temat e diskutimeve ishin të shumta. Kryeministri Rama ka vlerësuar pritjen e ngrohtë që i është bërë nga homologu i tij Kyriakos Mitsotakis, e cila i ka lënë një shije të mirë, pa specifikuar nëse ishin gatimet apo temat e diskutuara. Në një postim në rrjetet sociale, Rama shprehet se mes tij dhe Mitsotakis-it është diskutuar për situatën e krijuar nga koronavirusi, marrëdhëniet mes dy vendeve dhe vullnetin e plotë për ta zhvilluar bashkërisht më tej këtë raport. “Falënderues për shijen e shkëlqyer të mikpritjes në shtëpinë e Kryeministrit Mitsotakis, ku bëmë një bilanc të situatës me COVIDin, marrëdhënies mes dy vendeve tona dhe problematikave rajonale! Vullnet i plotë për ta zhvilluar bashkërisht më tej këtë marrëdhënie strategjike”, shkruan Rama. Ministri i Jashtëm i Greqisë,
Nikos Dendias, ka reaguar lidhur me takimin e zhvilluar me Kryeministrin e Shqipërisë Edi Rama. Sipas Dendias ne fokus të bisedimeve me Kryeministrin Edi Rama kanë qenë marrëdhëniet bilaterale, perspektiva e Shqipërisë për në Bashkimin Europian dhe zhvillimet e fundit rajonale. “Unë u takova me Kryeministrin e Shqipërisë, Edi Rama. Marrëdhëniet bilaterale, perspektiva e Shqipërisë në BE dhe zhvillimet e fundit rajonale në fokus”, shkruan Dendias. Mediat turke shkruan dje se
Edi Rama do t’i përcjellë Kryeministrit Mitsotakis një mesazh nga Presidenti i Turqisë, Rexhep Tayp Erdogan. Gjithashtu, palët kanë diskutuar edhe për situatën që do të çojë në Gjykatën e Hagës për detin, marrëdhëniet mes dy vendeve dhe në anën teknike si do të përcaktohen termat për të pasur një dokument të dakordësuar për në Gjykatën e Hagës. Greqia dhe Shqipëria do të punojnë sipas burimeve për një Traktat të ri Miqësie, i cili do të përmbajë edhe abrogimin e ligjit të luftës.
VAKSINAT Mediat shqiptare në Athinë raportuan për ndihmë nga Greqia për një numër jo të vogël vaksinash antiCOVID. “Top Channel” raportonte se Greqia do t’i japë Shqipërisë një sasi fillestare prej 1500 vaksinash që do të vijnë brenda pak ditësh. Këto vaksina do të shërbejnë për vaksinimin e mjekëve, ndërsa sipas gazetarit Artur Bibe, ky fond i dhënë nga Greqia me vaksina do të rritet deri në 10 mijë copë. “Në fokus të bisedimeve kanë qenë marrëveshjet dypalëshe, lufta ndaj COVID-19 si edhe në përgjithësi zhvillimet rajonale. Greqia ka vendosur të na dhurojë një fond emergjent me vaksina kundër COVID19. Bëhet fjalë për një sasi prej 1500 vaksina”, ka thënë gazetari i “Top Channel” nga Athina.