Aksidentoi për vdekje 50-vjeçarin, arrestohet drejtuesi i furgonit

Policia e Fierit ka zbardhur aksidentin tragjik të ndodhur tri ditë më parë në fshatin Vajkan të Fierit, ku humbi jetën një 50-vjeçar. Në pranga është vënë drejtuesi i mjetit, i cili u largua nga vendi i ngjarjes duke e lënë të aksidentuarin në një kanal. Po ashtu, në pranga përfundoi edhe pasagjeri i cili udhëtonte bashkë me drejtuesin e mjetit që shkaktoi aksidentin e rëndë. "Specialistët e Sektorit të Qarkullimit Rrugor në DVP Fier, në vijim të veprimeve intensive hetimore dhe procedurale të kryera për zbardhjen e rrethanave dhe dokumentimin e ngjarjes së ndodhur mbrëmjen e datës 05.01.2021 në vendin e quajtur 'Vajkan', ku u aksidentua me pasojë vdekje shtetasi G. Gj., bënë të mundur identifikimin dhe shpalljen në kërkim të autorit së bashku me mjetin që drejtonte tip furgon 'Sprinter Mercedez Benz', i cili pasi aksidentoi me pasojë vdekjen 50-vjeçarin, u largua nga vendngjarja", njoftoi ditën e djeshme Policia. Nga specialistët e Sektorit të Qarkullimit Rrugor në DVP Fier në bashkëpunim me shërbimet e Policisë Tiranë, u bë kapja dhe ndalimi për veprat penale "Shkelje e rregullave të qarkullimit rrugor" dhe "Largim nga vendi i aksidentit", i drejtuesit të mjetit, shtetasit E. Dh., 38 vjeç, banues në Tiranë dhe ndalimi i pasagjerit në këtë mjet, shtetasit K. M., 22 vjeç, banues në Tiranë për veprën penale "Moskallëzim krimi". Po ashtu, policia ka sekuestruar në cilësinë e provës materiale automjetin tip furgon "Sprinter Mercedez Benz", që drejtonte 38-vjeçari. Materialet i kaluan Prokurorisë pranë Gjykatës së Shkallës së Parë Fier për veprime të mëtejshme.