Strasburgu urdhëron mosdëbimin e turkut Simsek
Selami Simsek, i akuzuari si mbështetës i Gylenit, priste ekstradimin
Gjykata e Strasburgut ka urdhëruar shtetin Shqiptar që të mos e dëbojë shtetasin turk Selami Simsek. Pretendimet e Simsek se, ai persekutohet nga shteti turk për shkak se familjarët e tij, janë dënuar si mbështetës të klerikut Fehtullah Gylen, e bindën këtë gjykatë që të urdhërojë autoritetet shqiptare për të mos e dëbuar. Kjo masë sigurie për Simsek, mikun e Harun Çelik, i ekstraduar drejt Turqisë disa kohë më parë, do të jetë e vlefshme derisa të përfundojnë procedurat gjyqësore në ngarkim të tij. Selami Simsek u arrestua korrikun e vitit të kaluar me një vizë kanadeze false në Rinas, së bashku me mësuesin Harun Çelik. Ata pretenduan se po arratiseshin, pasi përndiqeshin nga Turqia si pjesë e lëvizjes së klerikut Fetullah Gylen. Më 1 janar 2020, Shqipëria dëboi Harun Çelik pavarësisht thirrjeve të tij në kërkim të azilit. Në vend të lirimit, 42-vjeçari Çelik u ngjit në një fuoristradë policie në burgun 302 për t’u dërguar fillimisht në Ambasadën turke në Tiranë, më pas në Drejtorinë e Kufirit dhe Migracionit dhe në fund në aeroportin “Nënë Tereza”, si pasagjer i detyruar i fluturimit të orës 20:55 të “Air Albania”, një prej kompanive simbol të bashkëpunimit mes qeverisë së Kryeministrit Edi Rama dhe asaj të Presidentit Rexhep Taip Erdogan. Çelik u burgos menjëherë sapo mbërriti në Turqi, ndërsa agjencia shtetërore e lajmeve, “Anadolu”, raportoi se ai ishte kapur në një operacion ku ishte përfshirë dhe shërbimi sekret turk, MIT. Në një proces të ndarë gjyqësor, Selami Simsek u dënua më 27 janar 2020 nga Gjykata e Tiranës me një vit e gjysmë burg, ndërsa përfitoi uljen e një të tretës së dënimit për shkak se pranoi fajin dhe shprehu pendesë. Rasti i Simsek dhe bashkudhëtarit të tij të dëbuar, Harun Çelik ka nxitur hetime për akuza të rrëmbimit të personit dhe zhdukjes nga një grup i Organizatës së Kombeve të Bashkuara mbi ndalimet arbitrare, i cili i dërgoi Shqipërisë një listë pyetjesh në maj. Selami Simsek u lirua nga burgu pasditen e 9 marsit 2020 dhe u shoqërua nga Policia te Drejtoria e Kufirit dhe Migracionit në Laprakë, ku bëri kërkesën për azil. Pas një sërë peripecish, Simsek u shoqërua në
Qendrën e Mbyllur për të Huajt në Karreç në periferi të Tiranës. Siç doli më vonë, Drejtoria e Azilit dhe Shtetësisë pranë Ministrisë së Brendshme mori menjëherë vendim për refuzimin e kërkesës së tij për azil. Ky vendim dyshohet nuk iu njoftua as shtetasit turk dhe as avokatit të tij. Pas publikimit të vendimit në media, avokati Elton Hyseni apeloi rastin në Komisioni Kombëtar për Azilin dhe Refugjatët, i cili është shkalla e dytë e apelimit për të huajt.
REXHEP TAYP ERDOGAN
“Ne, bashkë me autoritetet shqiptare dakordohemi se organizata terroriste e FETO-s përbën një kërcënim për të dyja vendet. Ne nuk do të lejojmë që FETO të helmojë marrëdhëniet mes dy vendeve. Me këtë rast, Turqia, me në krye fondacionin e Maarif dhe të gjitha institucionet e tjera, do të jenë pranë Shqipërisë.