Milan ia del me ruletën e penalltive ndaj Torinos
Ndeshje e stërzgjatur dhe sfilitëse ka rezultuar ajo mes Milanit dhe Torinos, e vlefshme për fazën e 1/8-ve në Kupën e Italisë. Kuqezinjtë u kualifikuan për më tej pas fitores 5 me 4 nga penalltitë e nevojshme, pasi 120 minutat përfunduan 0 me 0. Të dyja skuadrat kishin disa raste për shënim, por nuk ia dolën të dërgojnë topin në rrjetë. Në këtë sfidë, Zllatan Ibrahimoviç nisi titullar dhe luajti vetëm 45 minuta, pasi rikthehet nga një dëmtim muskulor që e la jashtë fushave prej disa javësh. Pas 90 minutave, në të cilat Milan ishte i pafat me goditjen e shtyllës disa herë, u desh zhvillimi i 30 minutave të kohës shtesë me dy pjesë nga 15'. Gjatë pjesës së dytë të kohës së rregullt, pati edhe një moment nervozizmi ku portieri Xhixho Donaruma u ndëshkua me karton të kuq nga stoli, me gjasë për protesta ndaj arbitrit për një penallti të pretenduar që iu mohua kuqezinjve. Në shtesën prej 30 minutash, Milan gjeti rrugën e rrjetës në të 113-ën, por goli ishte i parregullt. Duke barazuar 0-0 në 120 minuta, kjo ndeshje u vendos nga pika e bardhë e penalltive: Torinezët nisën të parët dhe përballë Tatarushanut shënuan me Belotin(1-0), Lukiçin (2-1) dhe Jankton me shumë fat për 3 me 2. Në penalltinë e katërt, Rinkoni gabon pasi pret Tatarushanu. Të pestën e godet portieri Vanja duke e shënuar. Për Milanin, Kesi startoi me gol, Hernandes barazoi në 2-2. Tonali realizoi për 3 me 3. Romanjoli kalon përpara kuqezinjtë 3 me 4. Të pestën te kuqezinjtë e godet saktë Çalhanoglu që kualifikon Milanin. Këto dy skuadra u përballën mes tyre edhe në fundjavë në ndeshjen e vlefshme për Serinë A, aty ku të besuarit e Piolit triumfuan me rezultatin 2-0. Sot, për një biletë në raundin çerekfinal të Kupës së Italisë do të luhen edhe ndeshjet Fiorentina-Inter, Napoli-Empoli dhe Juventus-Xhenoa.