Shtesa e pesioneve, dy vendimet për 2021
Zbardhet programi i vendimeve të qeverisë për 2021. Dy ndryshimet në skemën e pensioneve. Kategoritë që përfitojnë nga shtesa e si do ndryshojnë koeficentët për vitet e punës
Nga indeksimi i pensioneve, te miratimi i koeficienteve të reja që shërbejnë për rivlerësimin e pagave të para dhe pas ’94-ës.
Janë këto vendimet e qeverisë që pritet të zyrtarizohen brenda 4-mujorit të dytë të këtij viti. Në dokumentin e qeverisë të publikuar edhe Fletoren Zyrtare ku janë planifikuar të gjitha aktet nënligjore që do të kalojnë për miratim këtë vit, ka vetëm 2 projektvendime në fushën e sigurimeve shoqërore, konkretisht vendimi “Për indeksimin e pensioneve” dhe “Për përcaktimin e koeficienteve të indeksimit të bazës së vlerësimit vjetor individual, për llogaritjen fillestare të pensioneve”. RRITJA E PENSIONEVE
Për indeksimin e pensioneve, qeveria ka planifikuar 2.4 miliardë lekë, ose rreth 24 milionë dollarë. Janë më shumë se 670 mijë të moshuar, që duke nisur nga muaji prill, do të kenë mundësi të përfitojnë 2.5 për qind shtesë mbi masën e pensionit. Në këto kushte rritja varion mesatarisht 250 deri në 400 lekë. Shtesa do të aplikohet për pensionet e plota, ato të pjesshme dhe të reduktuara, pensionet familjare, të posaçme, të invaliditetit, pensionet e ish-ushtarakëve, profesorëve etj. Reforma e pensioneve e zyrtarizuar këtu e 6 vite më parë nuk parashikon rritje, por vetëm indeksim. Ligji i ri ndryshoi në thelb edhe mënyrën e llogaritjes së pensioneve, duke iu dhënë rëndësi kontributeve të derdhura ndër vite. Këtë vit për të marrë pension të plotë duhen 37 vite e 4 muaj periudhë kontributive, ndërsa mosha e daljes në pension për burrat do të vijojë të jetë 65 vjeç, ndërsa për gratë do të jetë 61 vjeç e 2 muaj. KOEFICIENTET Një tjetër vendim është ai për koeficientet. Kështu, të gjitha pensionet që do të lidhen rishtazi do të kenë koeficientet e reja mbi bazën e të cilave do të bëhet edhe llogaritja e përfitimit. Koeficientet e reja do të ndikojnë në rritjen e bazës së vlerësuar për të gjithë ata që do të aplikojnë për pensione të reja deri në fund të vitit 2021. Rivlerësimi i pagave iu jep mundësi të gjithë atyre që dalin këtë vit në pension që të përfitojnë më tepër. Kjo sepse krahas viteve kontributive, peshë ka edhe paga mbi bazën e së cilës janë derdhur kontributet. Sa më e lartë të jetë baza e vlerësueshme për efekt të llogaritjes së pensionit, aq më i lartë do të jetë edhe përfitimi mujor. Vitin e kaluar pagat e para ’94-ës u rivlerësuan me koeficientin 9.302. Janë mbi 15 mijë persona që mbushin këtë vit moshën e daljes në pension dhe që do të përfitojnë nga ky ndryshim. Sipas tabelës zyrtare të ISSH-së për vitin që lamë pas, aktualizimi i pagave mbi bazën e të cilës janë derdhur kontributet deri në vitin 1994 bëhet me koeficientin 9.302, por pas këtij viti koeficientet janë të ndryshme. Kështu, për vitin 1995 koeficienti është 7.486, ndërsa për një vit më vonë 5.808. Kjo vazhdon deri në vitin 2018, ku koeficienti i indeksimit është 1.024. Zakonisht për dy vitet e fundit nuk aplikohet formula e indeksimit, por pagat referohen aq sa janë, pra të paindeksuara.