Pas përplasjes me Sorekën, Rama në “sherr” edhe me Ambasadën franceze
Stok vaksinash, Ambasada franceze: Përveçse informacioni i dhënë nga Rama nuk është i vërtetë, sulmi nominativ s’është i përshtatshëm
Vështirësia e sigurimit të vaksinave anti-Covid duket se ka shfaqur pakënaqësitë e Kryeministrit Edi Rama me Bashkimin Europian. Që nga fundi i vitit 2020 deklaratat e kreut të qeverisë kundër BE-së dhe vendeve anëtare janë intensifikuar. Por ndërkohë nuk kanë munguar edhe reagimet. Në fundjavë Ambasada franceze reagoi pasi Kryeministri Rama e mori shembull shtetin francez në një emision televiziv për të ilustruar sjelljen e vendeve të BE-së, që sipas kreut të qeverisë në Shqipëri, mbajnë vaksinat stok dhe nuk i shpërndajnë për vendet e Ballkanit Perëndimor, që duke qenë më të brishtë financiarisht, kanë hasur vështirësi në sigurimin e dozave të para. Përmes një letre dërguar në Ministrinë e Jashtme, selia diplomatike e Francës në vendin tonë i konsideron të papërshtatshme akuzat e
Kryeministrit ndaj një vendi aleat. Ndërkohë, deklaratat e Kryeministrit i konsideron të pavërteta. Nga ana tjetër, edhe Kryeministri Rama iu kundërpërgjigj reagimit të ambasadës franceze, por jo në mënyrë zyrtare. Përmes një komenti në rrjetet sociale duke ndërvepruar me ndjekësit, Kryeministri thotë se deklaratat e tij janë keqinterpretuar, ndërsa ai nuk u heq asnjë presje atyre që ka thënë. Nga ana tjetër, kryetari i opozitës e personifikon Kryeministrin Rama me sanitaren që i mori 8 milionë lekë të vjetër një pacienti me Covid, duke e mashtruar dhe e akuzon kreun e qeverisë se e ka kthyer vendin të pabesueshëm për vendet e perëndimit. Sulmet verbale të kreut të qeverisë ndaj vendeve të BE-së nisën në fund të vitit që shkoi dhe u përforcuan në Turqi kur Kryeministri ishte në një vizitë zyrtare në krah të Erdogan.