Dilema për “të dënuarit” në listat e deputetëve në Kosovë
Pas rrëzimit të qeverisë së drejtuar nga Avdullah Hoti i LDKsë, për shkak të një vote të pavlefshme të një deputeti të dënuar në miratimin e saj, më 14 shkurt të këtij viti Kosova u drejtohet zgjedhjeve të jashtëzakonshme, sërish në kushte pandemie. Në vendimin e Gjykatës Kushtetuese për rrëzimin e qeverisë Hoti, thuhet se personat që kanë dënime të formës së prerë nuk duhet të jenë në Kuvend. Por klauzola mbetet ende e pasqaruar nëse vendimi vlen edhe për dënimet që janë dhënë para se në Kosovë të formulohej një ligj i tillë. Në listat e kandidatëve për deputetë të partive politike për zgjedhjet e 14 shkurtit janë përfshirë tre persona të dënuar me aktgjykim të formës së prerë në tri vitet e fundit. Albin Kurti dhe Albulena
Haxhiu nga lista e Lëvizjes Vetëvendosje janë të dënuar me kusht që nga shtatori i 2018-ës për shkak të hedhjes së gazit lotsjellës në seancë të Kuvendit, si dhe Milan Aritonoviç nga Lista Serbe, i cili është i dënuar me 500 euro gjobë nga gjykata për raportim të rremë të pasurisë. Këshilli Gjyqësor i Kosovës nga e hëna e javës së ardhme e deri më 20 janar duhet të verifikojë listat e partive politike që potencialisht kanë kandidatë me dënime të formës së prerë në tre vjetët e fundit. Në rast se KGJK-ja gjen persona me dënime të plotfuqishme, sipas Gëzim Shalës nga Instituti i Kosovës për Drejtësi, Komisioni Qendror Zgjedhor duhet t'ua refuzojë certifikimin për pjesëmarrje në zgjedhje. Duke iu referuar Aktgjykimit të Gjykatës Kushtetuese dhe Ligjit për Zgjedhjet e Përgjithshme, KGJKja, me kërkesë të KQZ-së, përveç të dënuarve në tre vjetët e fundit, do të verifikojë nëse ka edhe nga ata që kanë dënime plotësuese për moskandidim ose edhe nga ata që ushtrojnë profesionin e gjyqtarit dhe gjenden në listën e ndonjë partie. Nga Lëvizja Vetëvendosje nuk kanë pranuar të flasin nëse do t'i ndjekin procedurat ligjore deri në mundësimin e kandidimit të Kurtit apo nëse atë do ta zëvendësojnë me një emër tjetër në listë. Ndërkohë që Kurti është kandidati i tyre për deputet.