Tirana thyen tersin e barazimeve, Partizani triumfon në pistë bore

Tirana dhe Partizani fituan respektivisht ndaj Kastriotit dhe Skënderbeut në ndeshjet e vlefshme për javën e 14-të të Kategorisë Superiore. Kryeqytetasit rikthehen te fitorja pas pesë barazimesh, duke përmbysur krutanët, ndërsa "të kuqtë" triumfuan në "Strofën e ujqërve" të mbuluar në dëborë. Në sfidën tjetër të së shtunës, Apolonia surprizoi Laçin duke fituar minimalisht në Fier. TIRANA-KASTRIOTI Tirana gjen fitoren pas 5 barazimesh radhazi dhe në derbi shkon me moralin e duhur. Kampionët në fuqi, në ndeshjen e vlefshme për javën e 14-të të Kategorisë Superiore, kanë mundur me përmbysje Kastriotin me rezultatin 2-1, duke u ngjitur në vend të katërt, vetëm 3 pikë më pak sesa Teuta e Partizani. Krutanët shënuan të parët me anë të De Silvës, mirëpo kryeqytetasit me Muçin dhe Bathën u rikthyen te 3 pikët pas më shumë se një muaji (e fundit më 13 dhjetor 2020, Tirana-Apolonia 3-0).

APOLONIA-LAÇI Apolonia ka korrur një fitore të merituar ndaj Laçit dhe vendimtar ka qenë goli i shënuar nga Mario Gjata në minutën e 20-të. Skuadra fierake ka treguar forcë dhe karakter, vazhdimësi të ecurisë pozitive të javëve të fundit dhe shpresë për t'u shkëputur nga zona e rrezikut. Fitore morali, më se e merituar, ndaj një ekipi pretendent dhe tashmë fierakët nuk janë më të fundit. Nën drejtimin e Kamaratës, skuadra ka ndryshuar dhe duket se ka gjetur shinat e duhura për të dalë nga "zona e ftohtë". SKËNDERBEU-PARTIZANI

Në strofullin e "ujqërve" ishte skuadra e Partizanit që bëri ligjin. Dy gola të shpejtë u japin "demave" fitoren e rëndësishme, në një ndeshje që nuk kishte nevojë për taktikë loje, por vetëm për shpirt gare dhe sakrifice. Kishte dhe një episod në sekondat e fundit, ku bora nuk ishte "aleat" i Skënderbeut pasi një top i devijuar shkoi në shtyllë dhe jashtë. Është Mensah që mund të çonte shifrat në 2-2, por Partizani ishte me fat. Nga ana tjetër, Skënderbeu erdhi në këtë ndeshje me shumë ndryshime. Pavarësisht kushteve ku do të luhej dhe mospërshtatjes me ekipin, Ahmataj ndryshon tre nga katër lojtarët e prapavijës, duke hedhur në fushë tri afrimet e reja. Sadriut dhe Bajramit i besohet qendra e mbrojtjes ndërsa Zguro luan në të djathtë të prapavijës. Pikërisht këto ndryshime u duken se sollën problemet e para në radhët e Skënderbeut. Vetëm në tri minuta lojë, korçarët ndëshkohen dy herë, duke i dhënë Partizanit garancinë për fitore në një teren të tillë ku përmbysja është mjaft e vështirë.