Ligje natën e Vitit të Ri dhe votime pa lexuar, ‘skadon’ afati i parë për vaksinat
Ruçi: Është shkruar në marrëveshje, nuk do të botohet në shtyp
Mbajtja sekrete e marrëveshjes së propozuar nga qeveria me kompaninë “Pfizer” për vaksinën nuk kaloi pa debate mes kryeparlamentarit Ruçi dhe deputetëve të opozitës, për shkak se Kryeministri nuk kishte ardhur ende në sallë. Ata kanë kërkuar nga kreu i Kuvendit informacion mbi aktet normative që do të votonin, ndërsa e kanë cilësuar si të panevojshme sjelljen e qeverisë dhe miratimin e një marrëveshjeje pa u njohur më parë me përmbajtjen e saj. “Vaksina” është bërë “mollë” sherri midis deputetit Ralf Gjoni dhe kryeparlamentarit Ruçi. Deputeti Ralf Gjoni kërkoi që procedura e vaksinimit të jetë zyrtare dhe transparente, pasi në të kundërt, shteti rrezikon të kthehet në një çerdhe informale me një edukator. “Ky ekzekutiv nuk mund të tallet në këtë farë feje me Parlamentin. Po kërkoj në rendin e ditës tekstin e akteve normative, asnjë shenjë. Deputetët e Kuvendit nuk mundet të shprehen me votim, bazuar thjesht në tituj të lexuar nga Kryetari i Kuvendit. Keni kaluar nga debati i madh i vitit të kaluar me ministren Manastirliu për vaksinën Covax, e cila nuk e di se ku po fshihet, se nuk po shohim asnjë gjurmë të saj, në disa vaksina klandestine, deri në marrëveshjen teksti i së cilave mungon. A ka mundësi të ketë transparencë, sepse kemi përgjegjësi të madhe si deputetë për të votuar shuma të mëdha në buxhet për vaksinat, por procedurat duhet të bëhen transparente. Ndryshe po e kthejmë shtetin në një çerdhe”, tha deputeti Gjoni. E menjëhershme ishte edhe përgjigja e Kryeparlamentarit Ruçi, i cili tha: “Të lutem, avash, një minutë. Unë bëra një propozim. S’kemi të bëjmë me tallje të ekzekutivit dhe s’ka vend për ta thënë këtë. Më dëgjo, se unë të dëgjova. Të dy aktet unë i kam bërë publike në Konferencën e Kryetarëve, ku kam artikuluar fjalinë ‘nuk do të botohen’, por deputetët duhet të njihen absolutisht me to. Kështu që s’ka asgjë këtu për transparencë. Kjo është një kërkesë për të gjitha parlamentet dhe ne jemi të detyruar ta zbatojmë”. Edhe deputetja e opozitës Rudina Hajdari kërkoi më shumë informacion dhe transparencë për aktin normativ. “Ne duhet të jemi sa më transparentë me publikun, me qytetarët dhe aktet normative nuk kanë pse të kalojnë sot. Ne mund të rimblidhemi në një seancë tjetër, deputetët dhe qytetarët të njihen me këto akte normative. Ndaj nuk jam dakord e nuk kemi pse sillemi sikur ka ndonjë sekret të madh, përkundrazi ne duhet të jemi sa më transparentë me publikun se si bëhen këto marrëveshje me shtetet e tjera, se si merren këto vaksina, sa janë dhe si do jenë fazat që do shkojnë te qytetarët”, tha Hajdari. Ndërkohë Ruçi u shpreh se:
“Duket sikur kryetarët e grupeve edhe unë i kam thirrur për të miratuar ndonjë diçka, për të mbajtur ndonjë sekret etj. Edhe njëherë do të... s’po kuptohemi. Duket sikur kryetarët e grupeve i kam thirrur për të miratuar diçka. Akti normativ nr. 1 për miratimin e tekstit të marrëveshjes për prodhimin e furnizimin nëpërmjet kompanisë X dhe MSH, ISHP e Min. së Rindërtimit. Autorizimin e procedurës për lejimin e hyrjes. Akti normativ tjetër për dhënien e autorizimit. Kujt? MSH-së dhe ministrit të Rindërtimit, me prodhuesit e vaksinës antiCovid që janë certifikua nga FDA dhe EMA. Çfarë sekreti ka?” tha Ruçi.