Bien rastet e reja pozitive, nuk ndryshon situata në spitalet COVID

Ka nisur me rënie të rasteve pozitive me COVID-19 kjo javë. Kështu, dje janë raportuar vetëm 292 persona pozitivë, nga më shumë se 2300 testime të kryera. Ndërkohë që në raport me këtë shifër, personat e shëruar janë gati dyfish më shumë. “Në 24 orët e fundit janë shëruar 417 qytetarë, duke e çuar numrin e të shëruarve 40,870 që nga fillimi i epidemisë”, ka bërë me dije ministria. Prej dhjetorit që lamë pas, janë hequr ritestimet dhe qytetarët konsiderohen të shëruar dhe pa asnjë rrezik për të infektuar të tjerët në përfundim të 14 ditëve. Lidhur me rastet e reja, pjesa më e madhe janë në Tiranë, Fier dhe Vlorë. “Janë kryer 2343 testime dhe kanë rezultuar pozitivë 292 qytetarë. Rastet pozitive të konfirmuara janë identifikuar në këto bashki: 97 raste në Tiranë, 22 raste në Fier, 19 raste në Vlorë, 16 raste në Lushnje, 11 raste në Durrës dhe Lezhë, 10 raste në Kamzë, 9 raste në Elbasan, 8 raste në Berat, 7 raste në Kavajë, 6 raste në Shkodër, 5 raste në Tropojë, Sarandë, Delvinë, Përrenjas, 4 raste në Kurbin, Rrogozhinë, Mallakastër, Tepelenë,

Divjakë, Gramsh, 3 raste në Krujë, Mirditë, Librazhd, Gjirokastër, Malësi e Madhe, Bulqizë, 2 raste në Mat, Përmet, Dibër, Kuçovë, 1 rast në Korçë, Has, Pukë, Skrapar, Poliçan, Këlcyrë”, thuhet në njoftimin e Ministrisë së Shëndetësisë. Ndërkohë, ka mbetur e pandryshuar situata në 4 spitalet COVID, ku po vijojnë të marrin mjekim 282 pacientë, 25 në terapi intensive, nga të cilët 6 pacientë janë të intubuar. Të hënën janë raportuar 4 humbje jete dhe sipas të dhënave zyrtare janë 1281 persona që kanë ndërruar jetë në vendin tonë si pasojë e kësaj sëmundjeje, që prej fillimit të pandemisë. “Fatkeqësisht, me gjithë përpjekjet e mjekëve, 4 qytetarë nuk e kanë fituar betejën me COVID-19: 1 qytetar nga Durrësi, 1 qytetar nga Kavaja, 1 qytetar nga Rrogozhina, 1 qytetar nga Mirdita, të moshave 39-66 vjeç”.