Sot Trump pritet të nënshkruajë më shumë se 100 falje

Donald Trump pritet të nënshkruajë më shumë se 100 falje presidenciale të martën, gjatë orëve të tij të fundit në Shtëpinë e Bardhë, por mund të mos falë veten apo familjen e tij të ngushtë, u raportua të hënën. Zyrtarët e Shtëpisë së Bardhë thonë se Trump ka debatuar privatisht me ndihmësit, nëse ai duhet të ndërmarrë hapin e jashtëzakonshëm të faljes së tij. Disa persona të brendshëm të administratës thuhet se e kanë paralajmëruar kundër kësaj lëvizjeje, duke argumentuar se kjo do ta bënte Trump të dukej fajtor.

Të dielën, Trump u takua me dhëndrin e tij Jared Kushner, vajzën Ivanka Trump dhe këshilltarët e lartë, për të hedhur poshtë një listë të gjatë të kërkesave për falje, sipas “Washington Post”. Takimi zuri pjesën më të madhe të ditës. Presidenti u angazhua personalisht me detajet e çdo çështjeje. Disa studiues besojnë se një vetëfalje do të ishte në kundërshtim me Kushtetutën e SHBA-së, pasi ajo shkel parimin themelor që “askush nuk duhet të jetë në gjendje të gjykojë çështjen e tij”. Por çështja nuk është testuar kurrë. Diskutimet e Shtëpisë së Bardhë u zhvilluan në sfondin e një gjykimi të pritshëm të Senatit, pas sulmit më 6 janar nga një turmë pro-Trump, në ndërtesën e Kapitolit të SHBA-së. Nëse dënohet, Trump nuk mund të kandidojë përsëri për Presidencën në 2024-ën.

Sapo të lërë detyrën, Trump do të jetë i prekshëm nga ndjekja penale nga autoritetet federale dhe shtetërore për veprimet e tij gjatë kohës që ishte në detyrë dhe në lidhje me perandorinë e tij të biznesit. Nuk është e qartë nëse Trump do të veprojë për të falur anëtarët e rrethit të tij të ngushtë. Një tjetër emër i mundshëm është Rudy Giuliani, avokati personal prej kohësh i Trump, i cili udhëhoqi përpjekjet për të përmbysur rezultatin e zgjedhjeve të nëntorit. Trump dhe Giuliani thuhet se nuk po bien më dakord, për shkak të faturave të papaguara ligjore.