VENDIMI I RI
Dokumenti, ja sa do indeksohen pensionet
Gazeta zbardh vendimin e ri dhe skemën e qeverisë për indeksimin e pensioneve dhe shpenzimet për kompensimin e pronarëve. Tabela me shtesën e pensionit e pagesat e pronarëve
Në tri vitet e ardhshme, fondi në adresë të pensionistëve do të njohë rritje. Një gjë e tillë përcaktohet në vendimin “Për miratimin e kuadrit makroekonomik fiskal për periudhën 2022– 2024”, të botuar një ditë më parë edhe në Fletoren Zyrtare.
Në buxhetin e këtij viti janë planifikuar 2.4 miliardë lekë ose rreth 24 milionë dollarë, të cilat do të shkojnë për indeksimin e pensioneve. Po çfarë do të ndodhë deri në vitin 2024? Në dokument përcaktohet se për vitin 2022 janë parashikuar të shpenzohen 2.5 miliardë lekë ose 25 milionë dollarë. Për të vijuar me vitin 2023, ku janë planifikuar 3.02 miliardë lekë ose 30 milionë dollarë dhe pas tri vitesh, pra, në 2024, fondi i dedikuar për rritjen e pensioneve do të jetë 3.4 miliardë lekë ose rreth 34 milionë dollarë. Rritja e kësaj vlere me kalimin e viteve nuk do të thotë domosdoshmërisht më shumë para në xhepat e pensionistëve, kjo për faktin që fondi vjetor është i lidhur më së shumti me rritjen e numrit të pensionistëve që futen rishtazi në skemë. Aktualisht, janë rreth 67 mijë të moshuar në skemë, por në 2024-in numri i tyre pritet të jetë më i lartë, duke qenë se vit pas viti janë më shumë se 15 mijë persona që dalin në pension. Në këto kushte, edhe fondi që shkon në adresë të pensionistëve parashikohet të rritet me 10 milionë dollarë përgjatë tri viteve të ardhshme.
INDEKSIMI Me indeksimin e bërë një vit më parë, për pensionistët në fshat, pensioni minimal u rrit me 216 lekë; konkretisht nga 9418 lekë që ishte, arriti në vlerën e 9634 lekëve dhe ai maksimal nga 13 753 lekë, shkoi 14 069 lekë në muaj. Ndërkohë që pragu për të gjitha kategoritë është 28.139 lekë në muaj, në buxhetin e këtij viti janë planifikuar 2.4 miliardë lekë ose rreth 24 milionë dollarë, të cilat do të shkojnë për indeksimin e pensioneve. Njësoj si një vit më parë, edhe këtë vit rritja pritet të luhatet nga 2 deri në 2.5 për qind mbi masën e pensionit dhe pritet të aplikohet duke filluar nga muaji prill.
SKEMA Kujtojmë që skema e re e pensioneve që ka nisur të aplikohet prej janarit të 2015-s nuk parashikon rritje, por vetëm indeksim. Ligji i ri ndryshoi në thelb edhe mënyrën e llogaritjes së pensioneve, duke u dhënë rëndësi kontributeve të derdhura ndër vite. Këtë vit, për të marrë atë që quhet pension maksimal, si burrat, edhe gratë, duhet të kenë 37 vite e 4 muaj vjetërsi në punë. Ndërsa mosha e daljes në pension për burrat këtë vit është 65 vjeç dhe do të vazhdojë të jetë po kaq deri në vitin 2032. Ndërsa për gratë, nga viti 2015 mosha e daljes në pension rritet me dy muaj në vit, këtë vit është 61 vjeç e 2 muaj. Formula e re përcakton një pension bazë dhe shtesën. Pensioni bazë është 7637 lekë, ndërsa shtesa bazuar në formulën e llogaritjes së pensionit është 1% për çdo vit sigurimi, shumëzuar me bazën mesatare të vlerësueshme, që personat e siguruar kanë arritur nëpërmjet kontributeve të paguara.