Koalicionet e opozitës, Mediu: Nuk mund të ketë dy standarde me aleatët
Kreu i PR: Duhet të kemi një marrëdhënie elektorale të suksesshme, që tenton të rrisë votat e opozitës dhe jo të heqë edhe ato që janë
Kryetari i Partisë Demokratike, Lulzim Basha, dhe aleati i tij tradicional, Fatmir Mediu i PR-së, nuk kanë gjetur ende dakordësinë në nivel teknik për koalicionin e tyre në zgjedhjet e 25 prillit.
Në një prononcim për gazetën “Panorama”, kreu i PR-së, Fatmir Mediu, shprehet se kryedemokrati Basha, por edhe grupi negociator duhet të vlerësojnë peshën elektorale të republikanëve në të gjithë qarqet e vendit. Ndërkohë, la të kuptohet se kryedemokrati Basha po vepron me dy standarde në bashkëpunimin me aleatët e tij. “PR-ja dhe PD-ja kanë një histori marrëdhëniesh prej 30 vitesh të bashkëpunimit politik në pozitë dhe në opozitë për qëllimet e përbashkëta. Kjo frymë duhet të mbizotërojë edhe sot. Ajo që është e rëndësishme në koalicion është që votat e PDsë dhe të Partisë Republikane të jenë maksimale. Kjo është detyra ime si kryetar i PR-së, që votat të përkthehen në mandate efektive për opozitën dhe kryesish për Partinë Demokratike. Nga ana tjetër, kjo vjen si rezultat i vlerësimit të peshës elektorale dhe të autoriteteve politike të PR-së që duhet të përfshihen në një mënyrë apo në një tjetër në garën elektorale. Shumë i rëndësishëm është kriteri i dytë. Kriteri i barasvlershëm për të gjitha partitë politike të këtij koalicioni. Nuk mund të ketë dy kritere apo dy standarde. PR-ja ka peshën e vet dhe mandatet e fituara pa PD-në dhe duhet të konsiderohen. Dhe më tej, sa u përket emrave konkretë, ne nuk duhet të cenojmë asnjë autoritet konkurrues në PD, ashtu sikurse PD-ja nuk duhet të cenojë autoritetet konkurruese të PR-së. Nuk i kërkoj asgjë PD-së, veçse vlerësimin e peshës reale të PR-së që nuk vjen në mënyrë subjektive nga Fatmir Mediu, por nga pasha reale”, tha Mediu.
RREZIKU Kryetari i Partisë Republikane
tregoi për gazetën “Panorama” kurthin ku rrezikon të bjerë opozita e bashkuar e nxitur nga ndryshimet e fundit të Kodit Zgjedhor. Sipas Mediut, bashkëpunimi mes aleatëve duhet të jetë i tillë që të mund të futet në “kutinë” e opozitës çdo votë që mund t’i rrjedhë PS-së dhe jo opozita të humbasë edhe ato që ka, duke mos arritur që të krijojë frymën e duhur të bashkëpunimit elektoral. “Formula më e mirë e koalicionit është një koalicion që bashkohet në një program politik, bashkohet në një trup qeverisës dhe në një marrëdhënie elektorale ku përfshihen të gjithë aktivistët e partive politike jo vetëm në kandidimin për deputet, por në angazhimin e përbashkët të strukturave elektorale për të maksimalizuar votat. Votat nuk mblidhen vetëm në qendër, por nga çdo individ aktiv në çdo qendër votimi. Duke thënë këtë, pesha elektorale varet nga angazhimi i tyre dhe pesha reale elektorale. Pesha elektorale matet ose përmes zgjedhjeve parlamentare, ose mesatarja e zgjedhjeve parlamentare dhe lokale. Duke marrë parasysh këtë, PR-ja në të gjithë Shqipërinë ka shtrirje të mjaftueshme dhe ka kontribute që i vlen PD-së në të gjitha qarqet. Po të bëjmë një analizë se sa vota i duhen PSsë për të ruajtur status quo-në. Për të ruajtur atë që ka sot, PS-ja duhet të humbasë 40 mijë vota. Kjo do të thotë që të gjitha votat e subjekteve janë të vlefshme për t’i bërë analizë qark pas qarku. Duhet të ndeshemi me idenë e Ramës për të manipuluar zgjedhjet. Duhet ta kthejmë në një marrëdhënie elektorale të suksesshme që tenton të rrisë votat e opozitës dhe jo të heqë edhe ato që janë”, përfundoi Mediu. Më herët, Mediu ka prezantuar kandidatët e tij në qarkun e Tiranës dhe në Shkodër. Më parë Mediu është shprehur për gazetën “Panorama” se në 30 vite eksperienca ka treguar kur aleatët kanë arritur dakordësi, por edhe nuk kanë arritur. Lëvizjet e PR-së janë për të gjithë skenarët pohoi ai.