Përballja me shifrat për 300 mijë të punësuar

Rama: Nga 2013 në 2019, 225 mijë të punësuar më shumë

Ndoshta ishte premtimi më i madh i opozitës para 2013-ës, por duket shumë larg realizimit jo me një, por edhe më dy mandate. Dje për herë të parë, përballë njëri-tjetrit, Rama-Denaj dhe drejtoresha e Tatimeve, thanë arsye të ndryshme (secili duke vlerësuar punën e vet) për 300 mijë vendet e punës. Premtimi i PS-së në 2013-ën ishte për 300 mijë vende të reja punë. Por edhe me modifikimin, se formalizimi, pra deklarimi i të punësuarve në të zezë, mund të quhet punësim, sërish shifrat tregojnë të kundërtën. “Ne kemi premtuar 300 mijë vende pune dhe sot, thjesht duke iu referuar jo anketimeve, jo statistikave të nxjerra nga anketimet, por shifrave të Regjistrit të Punës në Republikën e Shqipërisë, hapeni dhe shikojeni ju që jeni ndërmjetësit mes palëve në skenën politike apo mexhlisin e debatit publik dhe qytetarëve - dhe thojuni njerëzve nëse është apo jo e vërtetë që në Regjistrin e Punës në Republikën e Shqipërisë në vitin 2013 kishte 473506 veta të regjistruar dhe në fund të vitit 2019 kishte 698235 punonjës të regjistruar. Janë apo nuk janë 225 mijë më shumë? Janë apo s’janë 225 mijë shqiptarë më shumë që paguhen dhe paguajnë, sipas vendit të tyre të punës”. Këtë fjali e tha Rama dje, duke u mburrur para gazetarëve. Edhe pse po krahasonte vitin 2013 me vitin 2019, pra më shumë se një mandat qeverisës, sërish shifra nuk është e plotë. Por më të paplotë e bëri drejtoresha e Tatimeve kur tha se shkak ishte edhe formalizimi me 10%. Pra rreth 60 mijë kanë ardhur nga formalizimi, jo vende të reja pune. Gjë që u mbështet edhe nga Ministria e Financave. “Flasim për një rritje konkrete të numrit të të punësuarve në nivelin më të lartë të viteve të fundit, duke arritur në nivelin e shifrës 698.235 për fondin e 2015-ës me gati 225.000 vende pune shtesë. Sigurisht që politikat fiskale kanë kontribuar në rritjen e të ardhurave, por miradministrimi fiskal ka qenë po aq i rëndësishëm”. Për të mbyllur debatin, nëse janë vende të reja pune, apo të formalizuara, ndërhyri sërish Rama. “Skllavëria nuk numërohet si vend pune në asnjë vend të planetit, kështu që ato mund t’i numëroni ju, por unë nuk i numëroj. Unë po ju them vende pune në Republikën e Shqipërisë dhe këtu kemi vitit 2019, pa llogaritur goditjet nga pandemia dhe rikthimin e shumë vendeve prapa etj., etj., por për të marrë një shifër që të mos kemi diskutime, këto janë librat e llogarive të shtetit. Dhe në librat e llogarive të shtetit është shumë e qartë që numri i vendeve të punës është rritur aq sa është rritur”.