ProjektiOrikum-Vlorë,Meta: Aty ku mungon transparenca, ka gjithmonë paligjshmëri
“Çdo projekt duhet të jetë i mirëmenduar dhe të respektojë të drejtat themelore kushtetuese të banorëve dhe pronarëve”
Presidenti i Republikës, Ilir Meta, ka deklaruar se projekti për rrugën Vlorë-Orikum është i ndërtuar në paligjshmëri, pasi transparenca për të ka munguar.
Meta ka treguar se gjatë bisedës me banorë të disa fshatrave në Vlorë ka mësuar se projekti për këtë rrugë ka mungesë të madhe të transparencës e për rrjedhojë ka edhe paligjshmëri. Sipas Presidentit banorët kanë të drejtë kushtetuese dhe ligjore të njihen me projektet që do të ndërtohen në zonën ku ata jetojnë dhe kanë pronat e tyre, madje t’u merret edhe mendim. Meta u shpreh: “U njoha me shqetësimin e drejtë se deri tani asnjë autoritet shtetëror, qendror apo vendor, nuk është konsultuar me ta, aq më tepër t’i ketë dëgjuar propozimet për zhvillimin e pronave të tyre dhe të zonës në tërësi, që ka një potencial të jashtëzakonshëm për zhvillimin e qëndrueshëm ekonomik dhe turistik”. Për Presidentin e Republikës nuk mund të ketë zhvillim të qëndrueshëm, nëse nuk respektohet e drejta e pronës. “Çdo zë banori, çdo vërejtje apo sugjerim, duhet të dëgjohet, të mbahet shënim dhe të vlerësohet. Nuk mund të ketë zhvillim të qëndrueshëm të zonave bregdetare, nëse nuk respektohet e drejta e pronës. Kjo është detyrë primare për qeverinë edhe në hartimin e implementimin e projektit të ‘Rehabilitimit dhe ndërtimit të objekteve në afërsi të rrugës bregdetare (Vlorë-Orikum)’”. Banorët i thanë Metës se qeveria i ka vënë përballë me “ujqërit e mëdhenj”, pasi në një anë qeveria iu merr pronën atyre për investime publike e në anën tjetër u jep leje ndërtimi të tjerëve. Banori: “Ne të gjithë jemi shumë të interesuar për zhvillimin e zonës. Familja jonë është pronare e 32 dynym toke në bregdet. Ne na e kanë përfshirë tokën vetën në fusha futbolli, volejbolli stadium dhe kënd lojërash. Në anën tjetër këta u japin leje të tjerëve. Këta po na detyrojnë t’u vemi ujqërve në gojë”.
Meta: Nuk jeni konsultuar asnjëherë për këtë projekt?
Banori: Jo, jo, absolutisht jo. Ne prekemi nga “Lungomare”, “Baypass”-i, nga trotuaret edhe nga shumë gjëra të tjera. Ne nuk jemi kundër këtyre, të bëhet “Lungomare”, trotuaret, ndriçimi se kjo na shërben neve, por kur nuk konsultohen me ne na bëhen dëme kolosale. Na cenohet prona totalisht. Të më thotë njëri nga ju që ky “Baypass”, që futet në një rikualifikim urban i shërben grupeve të interesit, komunitetit dhe të gjithë shqiptarëve dhe unë do ta liroj pronën time që sot. Teksa iu përgjigj ankesave të banorëve Presidenti sqaroi se “Çdo projekt duhet të jetë i mirëmenduar dhe të respektojë të drejtat themelore kushtetuese të banorëve dhe pronarëve. Fatkeqësisht, klientelizmi dhe neglizhenca ndaj interesave të banorëve, kanë sjellë shkelje të parimeve të barazisë përpara ligjit, cenim të të drejtave legjitime dhe të drejtën e tyre për një proces të rregullt ligjor. Aty ku nuk ka transparencë, ka gjithmonë paligjshmëri”. Në takimin me banorët e fshatrave të Radhimës, Orikumit, Tragjasit dhe Dukatit, Presidenti kërkoi edhe njëherë nga qeveria ndërtimin e rrugës së planifikuar dhe mos ndryshimin e destinacionit të huasë me Fondin Saudit të Zhvillimit.