Kim: Tusha bëri Kushtetuesen të jetë Gjykatë funksionale
“Përgjegjësi, ta drejtojë në shqyrtimin e çështjeve të rëndësishme”
t
Ambasadorja e Shteteve të Bashkuara të Amerikës në Tiranë, Yuri Kim, ka takuar sot kryetaren në detyrë të Gjykatës Kushtetuese, pak javë pasi ky institucion u bë funksional me plotësimin e kuorumit të gjyqtarëve.
Në një postim në “Twitter”, ambasadorja Kim shkruan se tashmë Vitore Tusha ka përgjegjësinë të drejtojë Gjykatën Kushtetuese në shqyrtimin e çështjeve të rëndësishme. Ndërsa e falënderoi për udhëheqjen e qëndrueshme, që sipas saj bëri të mundur që Gjykata Kushtetuese të bëhet funksionale. “U takova me gjyqtaren Tusha për ta falënderuar atë për udhëheqjen e qëndrueshme dhe të mençur të KED-it, e cila bëri të mundur që Gjykata Kushtetuese të bëhet funksionale. Tani, ajo ka përgjegjësinë të drejtojë
GJK-në në shqyrtimin e çështjeve të rëndësishme. SHBA do të vazhdojë mbështetjen e saj të fortë në mënyrë që Reforma në Drejtësi të japë rezultate”, shkruan Kim në “Twitter”.
Dekreti i Presidentit Ilir Meta për emërimin e Sonila Bejtes si anëtaren e shtatë të Gjykatës Kushtetuese, më 28 dhjetor të vitit 2020, u përshëndet menjëherë nga ndërkombëtarët. Të parët që reaguan ishin ambasadori i Bashkimit Europian, Luigi
Soreca dhe ambasadorja amerikane, Yuri Kim. “Palët iu përgjigjën Komisionit të Venecias, bënë funksionale Gjykatën Kushtetuese para datës 31 dhjetor. Falënderoj Presidentin Meta”, u shpreh Kim. Ndërsa Meta u përgëzua po ashtu edhe nga Soreca. “Sot, Presidenti Ilir Meta ka dekretuar Sonila Bejten si anëtaren e 7-të të Gjykatës Kushtetuese. Përgëzoj Presidentin Ilir Meta. Ky vendim përforcon funksionalitetin e Gjykatës”, shkruante ai. Për ambasadoren e SHBA-së, është me rëndësi që Gjykata Kushtetuese u bë funksionale para datës 31 dhjetor. “Duke vepruar së bashku me urgjencë, në përgjigje të drejtpërdrejtë të opinionit të Komisionit të Venecias, kushteve të BE-së, kërkesës së shqiptarëve, Presidenti, Parlamenti, KEDi, është bërë funksionale Gjykata Kushtetuese para datës 31 dhjetor. Puna duhet të vazhdojë, s’mund të ketë pushim deri sa të plotësohen 9 vendet”, shkruante Kim.