Aksidentet rrugore, humbin jetën dy persona
Në Shkodër u aksidentua për vdekje një 68-vjeçar
Gjatë muajit janar në vendin tonë janë shënuar një numër mjaft i lartë aksidentesh, ku disa prej tyre kanë rezultuar fatalë në jetë njerëzish. Vetëm ditën e djeshme, në Shkodër e Mamurras u shënuan dy aksidente, ku si pasojë humbën jetën dy persona. Në qytetin e Shkodrës, uniformat blu njoftuan se një motoçikletë u aksidentua nga një makinë, ndërsa humbi jetën një person. Viktima u identifikua si Lazer Lukani, 68 vjeç, banues në fshatin Ashtë. Goditja ka qenë e fortë, e për pasojë drejtuesi i mjetit tip “Benz” i identifikuar si shtetasi H. M., përfundoi në kanalin anësor të rrugës të mbushur me ujë, ku ai ndërroi jetë. Drejtuesi i automjetit u shoqërua në Polici për zbardhjen e dinamikës së aksidentit. “Më datë 19.01.2021, rreth orës 12:10, në aksin rrugor Shkodër-Bushat, në fshatin Beltojë, mjeti tip ‘Benz’, me drejtues shtetasin H. M., është përplasur me një motoçikletë ku si pasojë e përplasjes, drejtuesi i motoçikletës, shtetasi L. L., 68 vjeç banues në fshatin Ashtë, Shkodër, ka ndërruar jetë”, njoftoi Policia e Shkodrës.
AKSIDENTI NË MAMURRAS Ndërkohë, një 70-vjeçar humbi jetën, pasi motoçikleta me të cilën po udhëtonte u përplas nga një automjet. Aksidenti
ndodhi rreth orës 19:00 të ditës së djeshme në autostradën Milot-Thumanë pranë kryqëzimit të Mamurrasit në Kurbin. Sipas Policisë, viktima është shtetasi me iniciale P.P., banues në Fushë Mamurras. Nga të dhënat paraprake bëhet e ditur se i moshuari ka qenë duke kaluar rrugën me motoçikletë nga njëra anë në tjetrën, kur u përplas nga automjeti. Goditja ka qenë e fortë, duke i shkaktuar vdekjen e menjëhershme 70-vjeçarit, ndërsa Policia, e cila mbërriti në vendin e ngjarjes, shoqëroi në komisariat drejtuesin e mjetit që përplasi motoçikletën dhe nisi hetimet për zbardhjen e shkaqeve të kësaj ngjarje. Kujtojmë që aksidentet rrugore janë kthyer në një shqetësim, pasi në dy javët e para të vitit të ri kanë humbur jetën 12 persona për këto shkaqe, ndërsa janë dëmtuar dhjetëra të tjerë. Më tragjiku ishte ai i javës së kaluar në Lezhë, ku një familje nga Kosova u shua pas përplasjes së makinës me një kamion. Nga përplasja fatale shpëtoi shoferi i kamionit si dhe fëmija 3 vjeç, i cili ndodhet jashtë rrezikut për jetën. Siguria rrugore është kthyer në një problematikë të vazhdueshme, të cilën qeveria ka menduar ta japë me koncesion gjatë këtij viti, si një mundësi për menaxhim më të mirë. E.H