Pensionet, emra terin j që përfitojnë shtesën
ISSH miratoi dje listën e re me emrat e minatorëve, metalurgëve dhe naftëtarëve që marrin shtesën e pensionit në Tiranë e rrethe. Deri tani, 45 vendime për mbi 20 mijë përfitues
Miratohet shtesa e re për 113 pensionistë nga radhët e minatorëve, naftëtarëve dhe metalurgëve. Instituti i Sigurimeve Shoqërore ka bërë publike një ditë më parë listën me emrat e përfituesve në Tiranë dhe rrethe.
Trajtimi me pensione suplementare i këtyre tri kategorive ka nisur që prej nëntorit të 2019-s dhe gjatë kësaj periudhe Instituti i Sigurimeve Shoqërore ka marrë 45 vendime duke e çuar mbi 20 mijë numrin e përfituesve, nga 23 400 që parashikohet të trajtohen me këtë skemë. Çka do të thotë se në pjesën dërrmuese procesi është përmbyllur dhe se kanë mbetur vetëm një numër i reduktuar dosjesh për t'u marrë në shqyrtim nga ana e ISSH-së.
SHTESA E RE Sipas ligjit të ri, rritja për minatorët llogaritet me 1 për qind për çdo vit pune në nëntokë, ndërsa për naftëtarët dhe metalurgët me 0.6 për qind. Këtë shtesë mbi pension, e përfitojnë të gjithë personat që kanë jo më pak se 6 vite në profesionet dhe punët e përcaktuara të vështira dhe shumë të vështira. Konkretisht, nëse një ish-punonjës i nëntokës merr aktualisht një pension mujor prej 25 000 lekë dhe ka punuar në nëntokë 20 vite, ai do të marrë një shtesë prej 20 për qind të masës së pensionit, pra 5000 lekë në muaj. Me të njëjtën logjikë veprohet edhe për naftëtarët dhe metalurgët, por shtesa për këto dy kategori nuk llogaritet me 1 për qind, por me 0.6 për qind për çdo vit punë në sektor. Pra, nëse një naftëtar merr pension prej 27000 lekë në muaj dhe ka 20 vite punë në industrinë e naftës, shtesa mbi pension do të jetë 12 për qind ose 3240 lekë në muaj.
KONTRIBUTET Një tjetër ndryshim i zyrtarizuar me ligjin e ri është edhe ulja e pragut kontributiv. Minatorët, naftëtarët dhe metalurgët mund të përfitojnë pension të plotë, duke pasur vetëm 30 vite kontributive dhe jo 37 sa është aktualisht. Një ndryshim ky që po ashtu reflektohet duke rritur masën e përfitimit për këto tri kategori që janë pjesë e skemës suplementare.