Zbardhet Plani Kombëtar, ja kur nis vaksinimi për moshat mbi 65-vjeç, çmimi dhe grafiku i ndarjes së 500 mijë dozave
Del kontrata sekrete, në janar dhe shkurt 41 mijë doza, në mars, prill e qershor nuk ka furnizim. Sasia prej 400 mijë dozash pas korrikut
Një dozë vaksine anti-Covid e kompanisë “Pfizer”, sipas marrëveshjes së blerjes së qeverisë shqiptare, kushton 12 dollarë, ndërsa kostoja për një person shkon në 24 dollarë.
Gazeta “Panorama” bisedoi me një nga deputetët që lexoi marrëveshjen e firmosur mes qeverisë shqiptare dhe “Pfizer Export BV” në Holandë dhe ministrive të Shëndetësisë e Kujdesit Social dhe asaj të Shtetit për Rindërtimin, si dhe Institutit të Shëndetit Publik. Ai tha se në marrëveshje çmimi për një dozë është 12 dollarë, ndërsa në kontratë është parashikuar që sasia e parë e dozave nga “Pfizer” do të mbërrijë në Shqipëri në muajin janar dhe sasia do të jetë 10 mijë e 530 doza. Sipas të dhënave të parashikuara në kontratë, të lexuar nga deputeti i Parlamentit shqiptar i cili nuk preferoi të identifikohej sasia e dozave të dyta do të mbërrijë në Shqipëri në muajin shkurt dhe sasia është parashikuar 30 mijë e 420 doza. Në total Shqipëria ka dakordësuar me kompaninë “Pfizer” që të blejë 500 mijë doza. Mbi 40 mijë vijnë në dy muajt e parë të këtij viti, ndërsa do të ketë një ndërprerje të furnizimit me vaksina në pranverë dhe furnizimi me dozat e reja të “Pfizer” pritet që t’i mbërrijë Shqipërisë në tremujorin e tretë dhe të katërt të vitit. Por në marrëveshjen, siç pohon deputeti me të cilin komunikoi gazeta “Panorama”, nuk specifikohet se si do të jenë të ndara sasitë e dozave të vaksinave që do të vijnë në pjesën e dytë të vitit. Sasia e vaksinave që parashikohet të vijnë në dy muajt e parë të këtij viti do të shërbejë për rreth 20 mijë banorë të vendit. Ndërkohë, në kontratë nuk sqarohet se përse nuk do të ketë furnizim me vaksina për muajt mars, prill, maj e qershor.
PAGESA DHE TRANSPORTI
Ndërkohë “gogo.al” publikoi pjesë të kontratës së firmosur mes qeverisë shqiptare dhe “Pfizer”. Në kontratë shkruhej se fatura që vendi ynë do t’i paguajë prodhuesve të vaksinës është rreth 6 milionë dollarë. Në momentin e parë qeveria ka paguar 50% të faturës dhe pjesën tjetër më vonë. Sipas marrëveshjes, “Pfizer” del garant për të siguruar që produkti është prodhuar në përputhje me specifikimet, ndërsa qeveria shqiptare ka detyrimet që të bëjë transportin nga vendi i prodhimit drejt vendit tonë, që është edhe vendi i destinacionit. “Për çdo shpërndarje të mëtejshme dhe/ose transportim në një vend destinacioni që nuk është një pikë e përdorimit të produktit, blerësi do të ruajë dhe trajtojë produktin në mënyrën e përcaktuar te specifikimet, udhëzimet në shtojcën D dhe udhëzimet e dhëna nga ‘Pfizer’-i për të siguruar stabilitetin dhe integritetin e produktit. Për të shmangur dyshimet, blerësi do të ketë të gjitha shpenzimet për përdorimin e produktit pas transferimit nga ‘Pfizer’-i në vendin e destinacionit, përfshirë, por pa u kufizuar në ato për ruajtjen e produktit dhe shpërndarjen dhe administrimin e produktit (nëse zbatohet) në Shqipëri”, shkruhet në marrëveshjen sekrete.
KUSHTET E SIGURISË
“Blerësi do të jetë i vetmi përgjegjës për ruajtjen, trajtimin, shpërndarjen, transportimin, administrimin dhe përdorimin e produktit në Shqipëri pas dorëzimit të produktit tek ai ose të caktuarit e tij në vendin e destinacionit. Blerësi do të jetë përgjegjës dhe do të sigurojë që çdo pajisje e përdorur për të dorëzuar produktin, për shembull dërguesi/t dhe pajisja/ et monitoruese të jenë ruajtur në një vend të duhur të pastër dhe të sigurt për të mbrojtur dhe ruajtur funksionalitetin e pajisjeve të tilla (në kushte të kontrolluara, pa ekspozim ndaj motit ose dëmtuesve etj.). ‘Pfizer’ mund t’i sigurojë blerësit fletë të dhënash sigurie dhe informacione të tjera për të ndihmuar blerësin për të zhvilluar procese dhe procedura, përfshirë trajnimin, për të trajtuar produktin dhe materialet e produktit në një mënyrë të sigurt dhe në përputhje me ligjet… Blerësi përfaqëson dhe garanton që vetë ai do të sigurojë që të gjithë marrësit e produktit dhe materialet e produktit të kenë ekspertizën e nevojshme për të zhvilluar dhe zbatuar procedurat e përshtatshme dhe programet e trajnimit për të mundësuar trajtimin e duhur të produktit dhe materialeve të produktit në një mënyrë të sigurt dhe të ligjshme”, parashikohet në marrëveshjen sekrete.