Celibashi informon ambasadorët për parapërgatitjet
Soreca: Nevojë urgjente që shqiptarët të rinovojnë kartat e ID
Kur na ndajnë më pak se 100 ditë nga zgjedhjet e 25 prillit, ambasadori i OSBEsë në Tiranë zhvilloi një takim me diplomatët më të rëndësishëm në vendin tonë. Pjesë e takimit ishte edhe Komisioneri Shtetëror i Zgjedhjeve, Ilirjan Celibashi, i cili sipas një njoftimi të OSBE-së, ka informuar ambasadorët për masat e marra në parapërgatitjen e zgjedhjeve. “Për të lehtësuar dialogun mes aktorëve vendas dhe bashkësisë ndërkombëtare për çështjet e reformës zgjedhore, Prezenca ftoi në takim Komisionerin Shtetëror të Zgjedhjeve, Ilirjan Celibashin. Ai i njohu pjesëmarrësit me përgatitjet e KQZ-së për organizimin e zgjedhjeve, veçanërisht lidhur me përdorimin e teknologjisë, mundësimin e votës së emigrantëve shqiptarë dhe vëzhgimin e rasteve për keqpërdorimin e mundshëm të burimeve njerëzore për qëllime elektorale”, njoftoi zyra e OSBE-së. Fill pas këtij takimi, ambasadori i BEsë në vendin tonë, Luigi Soreca, përmes një “Twitter”-i u ka bërë thirrje shqiptarëve që të rinovojnë në mënyrë urgjente kartat e identifikimit. “Po punohet për zbatimin e Kodit të ri Zgjedhor bazuar në reformën e fundit. Por rinovimi i shumë dokumenteve biometrike të ID është një sfidë e madhe. Ne u bëjmë thirrje qytetarëve që t’i rinovojnë ato urgjentisht para ditës së zgjedhjeve”, shkroi ambasadori Soreca. Nga ana tjetër, KQZ-ja përmes një njoftimi të rëndësishëm u bëri apel qytetarëve shqiptarë që të kontrollojnë prezencën e emrit të tyre në listat e zgjedhësve: “Lista e Zgjedhësve” në faqen e internetit të KQZ-së “www.kqz.gov.al”, ose atë të Ministrisë së Brendshme “www.mb.gov.al”. Në rast se konstatoni parregullsi te të dhënat tuaja, apo dëshironi të ndryshoni ose të shtoni të dhëna në ekstraktin zgjedhor, paraqituni menjëherë pranë zyrës së Gjendjes Civile në Njësinë tuaj Administrative”, thuhet në njoftim. Gjithashtu, KQZ-ja u bën apel qytetarëve që iu ka mbaruar ose iu mbaron afati i vlefshmërisë së dokumentit të identifikimit, deri në datën 25 prill që të aplikojnë për rinovimin e tyre. KQZ thotë po ashtu se në zgjedhjet e 25 prillit 2021, synohet të implementohet identifikimi elektronik i zgjedhësve, ndaj një dokument i identifikimit i vlefshëm është shumë i rëndësishëm për pjesëmarrjen tuaj në votim.