Kryemadhi: Fasada, e vetmja punë e kësaj qeverie
“Më 25 prill të votojmë kundër atyre që gënjyen e vodhën”
Kryetarja e Lëvizjes Socialiste për Integrim, Monika Kryemadhi, ka deklaruar se njerëzit kanë nevojë për vëmendjen e shtetit dhe jo fasadën e tij, ndërsa programi i LSI-së do të jetë i prekshëm për të gjithë. Në takimet me banorë të Vorës dhe Farkës, Kryemadhi u shpreh se qeveria i ka braktisur qytetarët e thjeshtë dhe fasada është puna e vetme e kësaj qeverie. Gjatë bisedës me ta, ajo tha se në vendi është krijuar një situatë e vështirë për të gjithë, sidomos pas tërmetit dhe pandemisë që vunë në dukje fasadën qeverisëse dhe jo institucione në shërbim të qytetarëve. “Situata në vend është tepër e vështirë, pasi kemi njerëz që kanë humbur vendet e tyre të punës, bizneset po shkojnë drejt falimentimit, taksat e larta, çmimi i lartë i energjisë elektrike, janë gjëra që çdo ditë e më shumë po ia marrin frymën ekonomisë dhe familjes shqiptare. Në pallatet e dëmtuara nga tërmeti, ku faktikisht banorët jo vetëm që nuk kanë asnjë bonus qiraje, por nuk kanë asnjë plan se ku do të jetojnë, nëse pallatet e tyre do të shemben, rindërtohen, apo rikonstruktohen. Mungesa e sigurisë dhe e garancisë që shteti u jep banorëve është shumë e madhe”, tha Kryemadhi. Për kreun e LSI-së, 25 prilli është dita kur shqiptarët do të ndëshkojnë me votë atë që i ka mashtruar dhe blerë duke u shprehur se: “Duhet të marrë fund njëherë e përgjithmonë blerja e varfërisë apo e nënshtrimit të shqiptarëve ditën e zgjedhjeve. Ne sot duhet t’u bëjmë thirrje qytetarëve që të shkojnë në kutinë e votimit për të ndëshkuar me votë atë që e ka gënjyer, atë që i ka grabitur pronën, që e ka keqtrajtuar dhe të vlerësojë me votë atë që i është gjendur pranë në momente të vështira dhe që ka mbajtur premtimet në marrëdhënie me ta”. Për sa i përket programit me të cilin LSIja do t’u kërkojë votën qytetarëve, Kryemadhi konfirmoi se: “Shumë shpejt ne do të kemi dhe prezantimin e programit që nuk do të jetë thjesht në kuadrin e një prezantimi propagandistik, por do të jetë i prekshëm, real, për çdo qytetar, sepse në fund të ditës një nga gjërat më të rëndësishme është që duhet të jemi dhe të vërtetë me njerëzit. Njerëzit janë lodhur nga propaganda, nga demagogjia, nga fasada, sepse janë lodhur nga shifrat”. Duke përmendur denoncimin e mjekëve dhe infermierëve të Vorës për mungesën e vëmendjes dhe mjeteve mbrojtëse në luftën kundër Covid-19, kryetarja e LSI-së tha: “Reagimi i institucioneve është zero dhe nga ana tjetër shikojmë një propagandë që bëjnë sikur po përgjërohen për mjekët, nga ana tjetër një degradim të sistemit shëndetësor, që është kthyer në gjobëvënie. Dhe ajo që të bën më shumë përshtypje është dy standardizimi i funksionimit të strukturave të shtetit ndaj qytetarëve”.