I dënuar për drogë, prokuroria i sekuestron 5 milionë euro pasuri
Prokuroria e Tiranës ka vendosur nën sekuestro preventive pasuritë e paluajtshme ndaj shtetasit Sokol Marku, i dënuar më parë për prodhim dhe shitje të lëndëve narkotike. Sipas Prokurorisë, shtetasi Sokol Marku, 32 vjeç, lindur në Mirditë dhe banues në Tiranë, rezulton i dënuar sipas një vendimi të dhënë nga Gjykata e Tiranës më datës 13 mars 2013. Ai gjithashtu, sipas akuzës, ka bërë një ndreqje të vendimit të dhënë, pasi ka pasur paqartësi mbi dhënien e tij (nëse kishim të bënim me një dënim me burgim apo dënim alternativ), duke u dënuar kështu me pesë vite burg për veprën penale "Prodhim dhe shitje të narkotikëve", parashikuar nga neni 283/1 i K. Penal. Gjithashtu, më datë 05.04.2016 gjykata e Tiranës e ka dënuar me 1 muaj burg për veprën penale "Kundërshtim i punonjësit që kryen një detyrë shtetërore ose një shërbim publik", parashikuar nga neni 235/1 të K. Penal. Gjithashtu, Prokuroria njofton se nga të dhënat e marra ky shtetas merret dhe me trafik të lëndëve narkotike në Itali. Sa më sipër, Prokuroria pranë Gjykatës së Shkallës së Parë Tiranë, në bazë të materialeve të dërguara nga Seksioni për Hetimin e Pastrimit të Parave dhe Aseteve Kriminale, në Drejtorinë Vendore të Policisë Tiranë është bërë regjistrimi i procedimit penal në vitin 2019 për veprat penale të "Pastrimit të produkteve të veprës penale ose të veprimtarisë kriminale" parashikuar nga neni 287, ku janë sekuestruar 18 automjete luksoze, dy aktivitete biznesi lokale, si dhe 10 pasuri të paluajtshme, si njësi tregtare, vila apo apartamente me një vlerë rreth 5 milionë euro.