URIMET E TIRANËS ZYRTARE, META: PARTNERITETI STRATEGJIK ME SHBA, GARANCI JETIKE
Presidenti Ilir Meta shpreh urimet edhe në emër të popullit shqiptar për Presidentin e ri të Shteteve të Bashkuara të Amerikës, Joe Biden. "Urimet më të sinqerta, të miat dhe të popullit shqiptar, për Presidentin e Shteteve të Bashkuara të Amerikës, Sh. T. Z. Joe Biden dhe Zëvendëspresidenten, Sh. S. Znj. Kamila Harris. Jemi të bindur se marrëdhëniet tona do të vazhdojnë të zhvillohen më tej, ndërsa së bashku forcojmë bashkëpunimin transatlantik dhe në NATO. Shqipëria do të vijojë të mbështetet në partneritetin strategjik me SHBA-në, si garanci jetike për paqen dhe stabilitetin në rajonin tonë dhe në çështje të rëndësishme globale", ka shkruar Meta. Nga qeveria ka uruar ministrja e Jashtme e Kosovës, Olta Xhaçka. "Urime Presidentit Joe Biden, Zv/Presidentes Kamala Harris. Sytë e botës janë drejt jush!", ka shkruar Xhaçka. Kryetari i Grupit Parlamentar të Partisë Socialiste, Taulant Balla, ka reaguar pas ceremonisë së inaugurimit të Presidentit të ri të SHBAsë, Joe Biden. Balla deklaron se gjatë gjithë karrierës së tij në Senat dhe si Zëvendëspresident i SHBA-së, Biden ka qenë një zë kryesor mbështetës i kauzës shqiptare për pavarësimin dhe shtetësinë e Kosovës, si dhe i marrëdhënieve të shkëlqyera me Shqipërinë. Edhe kreu i Partisë Demokratike, Lulzim Basha, i përcjell një mesazh urimi Presidentit të ri të SHBA-së, Joe Biden. "Urime Presidentit Joe Biden dhe zëvendëspresidentes Kamala Harris. Unë pres që të punoj me ju për të forcuar më tej aleancën SHBA-Shqipëri. Ju keni provuar që demokracia është e fortë dhe se ndryshimi është i mundur. Urime më të ngrohta nga të gjithë qytetarët e Shqipërisë", shkruan Basha.