Vendimi, skemë e re për legalizimin e shtëpive

Pak muaj para zgjedhjeve ndryshon skema e legalizimit. Gazeta zbardh vendimin e ri me kategoritë që do favorizohen. Çfarë ndodh me 90 mijë ndërtime të skualifikuara. Afatet e reja për tapinë

Janë gati mbi 90 mijë ndërtime në dosjen e kuqe. Objekte të cilat nuk mund të legalizohen pasi bien ndesh me kriteret e kualifikimit.

Por përmes një vendimi të ri, qeveria zgjeron hartën e ndërtimeve pa leje që do të formalizohen, duke u dhënë mundësinë këtyre familjeve që të bëhen pjesë e procesit. Nisma "Për përcaktimin e rregullave të zbatimit të kritereve të legalizimit dhe miratimin e modelit të aktit të legalizimit për ndërtimet pa leje" është zyrtarizuar në fillim të këtij muaji. "Aktet e përjashtimit nga legalizimi të miratuara përpara hyrjes në fuqi të këtij vendimi rishikohen sipas kreut IV, të pjesës së gjashtë të Kodit të Procedurave Administrative, në 12 përputhje me kriteret e përcaktuara në nenin 18, të ligjit nr. 20/2020 "Për përfundimin e proceseve kalimtare të pronësisë në Republikën e Shqipërisë", dhe në këtë vendim, nëse këto të fundit ose ndryshimi i rrethanave të faktit mundësojnë kualifikimin e ndërtimeve për legalizim. Rishikimi lejohet me kusht që për ndërtimin të mos jetë vendosur më parë prishja nga autoritetet e kontrollit të zhvillimit të territorit", thuhet në vendim. Në tabelë janë edhe kriteret e reja të cilat penalizojnë qytetarët. Ndër to është edhe përjashtimi nga procesi i ndërtimeve të ngritura në territore të destinuara për investime strategjike.

AFATET

Sikundër parashikohet edhe në ligj, për përmbylljen e procedurave të legalizimit do të mjaftojnë vetëm 60 ditë. "Drejtoria vendore e ASHK-së është e detyruar të dalë me vendim për legalizimin ose jo të ndërtimit pa leje, brenda 60 ditëve nga data e evidentimit në terren, sipas datës së aktit të evidentimit në terren", vihet në dukje në vendimin e ri . Brenda një muaji qytetarët do të duhet të dorëzojnë aktekspertizën për objektin. "Nëse poseduesi nuk dorëzon brenda 30 ditëve nga njoftimi, aktekspertizën apo deklaratën e shembjes së objektit ose dokumentacionin për shqyrtimin sipas pikës 28, të këtij vendimi, kur ai është i nevojshëm, drejtoria vendore pezullon procedurën administrative të legalizimit. Drejtoria vendore e ASHK-së vendos përfundimisht moslegalizimin e ndërtimit, kur këto akte nuk dorëzohen brenda 1 viti nga data e pezullimit të procedurës administrative". Por çfarë do të ndodhë në rastet kur për të njëjtin ndërtim ka më shumë sesa një aplikim? "Kur gjatë procedurave të legalizimit konstatohet se për të njëjtin ndërtim pa leje ka aplikime të ndryshme nga dy ose më shumë subjekte, procedurat e legalizimit vijojnë në favor të subjektit që ka aplikuar i pari në kohë, në përputhje me pikën 1, të nenit 26, të ligjit nr. 20/2020 'Për përfundimin e proceseve kalimtare të pronësisë në Republikën e Shqipërisë'", është zgjidhja që ofrohet përmes kësaj nisme të re ligjore.

TARIFAT

Tarifat për shërbimin nuk do të jenë kushtëzuese për regjistrimin nga Kadastra. "Regjistrimi kryhet nga drejtoria vendore e ASHK-së, pa u kushtëzuar nga aplikimi për shërbim kadastral dhe nga parapagimi i tarifave kadastrale. Pas kryerjes së shërbimit të regjistrimit, ajo njofton subjektin përfitues për të shlyer tarifën e regjistrimit dhe tarifat e tjera për t'u pajisur me aktet kadastrale, si certifikatë regjistrimi pronësie, kopje kartele, kopje të fragmentit të hartës kadastrale", theksohet në vendim.