Vlerësimi, Spartak Braho shpallet “Qytetar Nderi” i Skraparit
“Në mbrojtje të vlerave historike të LANÇ dhe të të rënëve në luftë”
Këshilli i Bashkisë Skrapar i ka dhënë deputetit socialist, Spartak Braho, titullin “Qytetar Nderi”.
Në motivacionin që shoqëron titullin përmendet kontributi i tij si deputet, publicist, promovimi i atdhetarizmit dhe figurave dhe traditave të Skraparit. “Në vlerësim të veprimtarisë së tij të shquar si deputet i Kuvendit të Shqipërisë në disa legjislatura, si publicist dhe veprimtar i devotshëm shoqëror në mbrojtje të vlerave historike të Luftës Antifashiste Nacionalçlirimtare dhe të rënëve në këtë luftë, promovimit të vazhdueshëm të atdhetarizmit përmes lartësimit të figurave të shquara të Skraparit e më gjerë, si dhe traditave që i kanë dhënë nder dhe dinjitet në çdo kohë krahinës së Skraparit”. Deputeti Braho është një nga themeluesit e Partisë Socialiste, duke kontribuar në ngritjen e strukturave socialiste në qytetin e Durrësit e më pas deputet i kësaj partie dhe anëtar i forumeve qendrore të saj. Në tetor 2017, Braho u emërua këshilltar për Parlamentin i Kryeministrit Edi Rama. Pas dorëheqjes së Saimir Tahirit ai u betua si deputet i Kuvendit të Shqipërisë. Braho ishte kandidati i 19-të në listën shumemërore të PSsë për qarkun Tiranë. Spartak Braho u bë shumë aktiv vitin e kaluar, kur u përplas me ish-drejtuesin e Institutit të Krimeve dhe Pasojave të Komunizmit, Agron Tufa. Braho e akuzoi Tufën se përmes punës pranë ISKK-së ka shtrembëruar historinë e Luftës Nacionalçlirimtare dhe heronjtë e saj. Në prill të 2019, në Komisionin e Ligjeve, Braho ka kërkuar shkarkimin e Tufës nga posti i drejtorit të Institutit për Krimet dhe Pasojat e Komunizmit. “Ky institut me Agron Tufën në krye është kthyer në një seksion të Ballit Kombëtar. Ka marrë përsipër të nxijë çdo gjë, përfshirë luftën, heronjtë. Nuk ka asgjë shkencore në analizat që ka bërë ky institut. Ky është thjesht një institut studimi, s’ka pse të ngatërrohet me politikën. S’ka pse operon me terminologji lustracioni, sepse lustracioni është i ndaluar me ligj. Ka shumë helm në veprimtarinë e këtij instituti. Në këto kushte, nuk e votoj këtë rezolutë, madje kërkoj shkarkimin e Agron Tufës derisa t’i thërrasë mendjes”, tha Braho.
Veprimtar i devotshëm shoqëror në mbrojtje të vlerave historike të Luftës Antifashiste Nacionalçlirimtare dhe të të rënëve në këtë luftë, promovimit të vazhdueshëm të atdhetarizmit përmes lartësimit të figurave të shquara të Skraparit e më gjerë, si dhe traditave që i kanë dhënë nder dhe dinjitet në çdo kohë krahinës së Skraparit