Kush janë pronarët ku mësynë forcat RENEA
Flamur Haka konsiderohet si kreu i “të fortëve” në Nikël
Personave, banesat e të cilëve ishin objekt i kontrollit të operacionit blic të zhvilluar në orët e para të ditës së djeshme me urdhër të SPAK-ut, u atribuohen disa vepra të rënda penale. Flamur Haka, Durim Bami dhe Ylli Cangu janë emra të njohur për drejtësinë. Flamur Haka konsiderohet si kreu i “të fortëve” në Nikël dhe në shkurt të vitit 2008 është shpallur fajtor nga Gjykata e Krimeve të Rënda me 16 vite burgim. Mësohet se Flamur Haka është dënuar për vrasje me paramendim për “Hakmarrje e mbetur në tentativë” dhe për “Armëmbajtje pa leje”. Asokohe, Haka tentoi të vrasë shtetasin Bledar Ulliri, por pavarësisht se u dënua me 16 vite burg, ai u lirua pas 6 vitesh duke iu ulur me 10 vite dënimi. Durim Bami është një tjetër personazh, ndoshta ndër më të njohurit në rrethin e Krujës, për shkak të atentatit të pretenduar ndaj deputetit Tom Doshi. Bami ka disa ngjarje kriminale mbi shpinë, ndërsa organet ligjzbatuese pretendojnë se ai ka marrë pjesë në ngjarje të rënda kriminale ende të pazbardhura. Ylli Çangu, kunati i Durim Bamit, gjithashtu është një emër i njohur. Ai është dënuar më parë. Çangu në të kaluarën ka qenë i hetuar për disa ngjarje kriminale. Ai dyshohet të jetë autor në disa raste të vënies së tritolit, në gjobëvënie ,por edhe rrëmbime personash. Ndërsa Ervin Kodra i shpëtoi mrekullisht atentatit në fillim të muajit nëntor 2020. Më datë 04.11.2020, rreth orës 15:20, në Tapizë, Krujë, në rrethana ende të paqarta, në momentin që Ervin Kodra dhe kushëriri i tij, Durim Bami po ktheheshin në shtëpi, persona ende të paidentifikuar hapën zjarr në drejtim të “Range Roverit” me të cilin udhëtonin, ku mbeti i plagosur 35-vjeçari.