Basha zbulon qytetin ku do të kandidojë më 25 prill: Tiranamëdhamandatineparë
Përgjimet e antimafias, kryedemokrati: Është fare e qartë që shqiptarët tashmë kanë 8 vite që shohin të njëjtën gjë
Kryetari i Partisë Demokratike, Lulzim Basha, do ta vendosë emrin e tij në listën e Qarkut të Tiranës në zgjedhjet e 25 prillit, ku ai kandidon për Kryeministër.
Në një intervistë për “News 24”, kreu i selisë blu u shpreh se kishte zgjedhur kryeqytetin, pasi në këtë qark ai ka fituar për herë të parë mandatin e deputetit. Gjatë intervistës, kryedemokrati Basha garantoi se në zgjedhjet e 25 prillit opozita do të jetë e bashkuar, ndërsa tregoi procesin se ku ndodhen negociatat me PR dhe PDIU. Sakaq, ai hodhi poshtë kategorikisht çdo aludim për një bashkëqeverisje me PS-në. Sipas Bashës, kjo është propagandë që i shërben Kryeministrit. Kreu i opozitës synoi ta orientonte vëmendjen e tij gjatë intervistës tek ekonomia e shqiptarëve dhe alternativën e tij nëse vjen në krye të vendit pas 25 prillit. Basha foli për taksën 9% dhe konkurrencën e ndershme. Ndërkohë, reagoi edhe për përgjimet e fundit të antimafIas italiane. BASHA ZBULON SE KU
DO KANDIDOJË “Do të garoj në qytetin e Tiranës. Ky qytet më ka besuar për herë të parë përfaqësimin si deputet. Më ka besuar drejtimin si kryebashkiak dhe unë do të garojë në qytetin e Tiranës. Jo, nuk do të garoj në asnjë qark tjetër. Çdo qark do të ketë deputetët e vet dhe drejtuesit e vet. Megjithëse si kryetar i partisë dhe si kandidat për Kryeministër i opozitës së bashkuar, unë do të bëj fushatë në të gjithë vendin, pa diskutim”.
Ndalemi pak tani tek opozita e bashkuar, për të folur se sa kompakte. Le të flasim edhe me deklaratat e zonjës Kryemadhi, kryetares së Lëvizjes Socialiste për Integrim. ¨shtë bërë e ditur se do të dilet me dy lista. ¨shtë pikë për opozitën kjo apo le të themi edhe mund të humbë?!
Opozita ka kalkuluar me përgjegjësi të madhe skemën për të maksimalizuar votën. Ajo që na bashkon të gjithëve ne është domosdoshmëria për të larguar Edi Ramën, që është e keqja e këtij vendi, është dështimi 8-vjeçar dhe shkaku i varfërisë dhe shkaku i krizës psikologjike dhe sociale, në të cilën gjenden sot shqiptarët. Unë e kuptoj që ka interes gjithmonë edhe për këtë, le të themi, aspekt taktik të politikës. Më ndjeni në qoftë se vëmendja ime sot edhe në këtë bisedë që kemi bashkë, nuk është kaq shumë takticizmi politik sesa tek ato që janë problemet e vërteta të shqiptarëve. Nuk mendoj që shqiptarët sot shqetësim kryesor kanë se si do të maksimalizojmë votën e PD-LSI, pa diskutim që ne kemi një plan të qartë dhe do ta shpalosim atë hap pas hapi. Sepse qëllimi ynë kryesor është që çdo votë e shumicës absolute të shqiptarëve që duan largimin e Ramës, të shkojë aty ku duhet edhe të numërohet
U ndalëm te LSI-ja, por, në fakt, është momenti për të folur pak edhe për aleatët, shohim dhe foton ilustruese. Ende nuk janë përmbyllur marrëveshjet e Partisë Demokratike me PDIU, po kështu edhe me PR. Ku është ngërçi, z.Basha, sepse i kanë shfaqur pas deklaratave pretendimet e tyre z.Mediu, por edhe z.Idrizi? Cfarë po ndodh që nuk po mbyllet si marrëveshje?
Jo, nuk ka asnjë ngërç. Unë të siguroj që opozita do të dalë e bashkuar në këto zgjedhje si asnjë opozitë më parë dhe koalicioni fitimtar i 25 prillit do të bëjë realitet të gjitha zotimet që ka marrë para shqiptarëve. Natyrisht, përgjegjësia kryesore për këtë i takon Partisë Demokratike, më takon mua. Dhe pikërisht në kuadër të kësaj përgjegjësie mbi parimet tashmë të njohura dhe të shpallura botërisht, gjithsecili do të ketë mundësinë të shpalosë para shqiptarëve, le të themi, fuqinë dhe angazhimin për të qenë pjesë e kësaj fitoreje dhe në bazë të vlerësimit gjithsecilit prej anëtarëve të koalicionit dhe të Partisë Demokratike do të marrë peshën e përgjegjësisë për të kthyer programin tonë në një realitet ndryshimi për çdo shqiptar.
Dakord. Kur do të bëhet marrëveshja?
Po ndodh kjo. Gjatë kohës që flasim edhe sot.
Nuk është mbyllur marrëveshja me PR, edhe me PDIU-në.
Shiko, ne kemi një marrëveshje. Është një keqkuptim mediatik, që nuk është mbyllur marrëveshja.
Atëherë, është koha ta sqarojmë.
Domethënë, ne kemi marrëveshje që opozita është e bashkuar në këto zgjedhje. Detajet në kushtet e pas 5 tetorit janë subjekt i grupeve që po punojnë intensivisht dhe të jeni e sigurt që këtu nuk ka për të pasur asnjë surprizë, përkundrazi do të materializohet vullneti ynë që së bashku t’i japim fund kësaj së keqeje në 25 prill.
Domethënë, z. Mediu kërkon më tepër se një mandat të sigurt?
Unë nuk jam pjesë e drejtpërdrejtë e këtyre negociatave, por ju siguroj që ajo që na bashkon është tmerrësisht më e madhe se çdo gjë që duket sikur na ndan. Ne na bashkon vendosmëria për të larguar Edi Ramën, për të larguar të keqen dhe për t’u dhënë shqiptarëve shpresën dhe ndryshimin që meritojnë dhe që është plotësisht e mundur.
Koalicion me PS-në pas zgjedhjeve?
Kjo është propagandë e Partisë Socialiste e që tregon, e Edi Ramës, që tregon se sa të dëshpëruar, me qëllim për të motivuar bazën e pamotivuar socialiste e që ndihet po kaq e tradhtuar si shumica dërmuese e shqiptarëve që kërkojnë ndryshim. Shikoni, kur shohin 80% apo 82% apo 85%, varësisht nga sondazhet e ndryshme që botohen dhe që duan ndryshimin, pa diskutim në këtë përqindje të madhe ka dhe shumë socialistë, të cilët janë të neveritur jo thjesht sepse janë lënë jashtë tepsisë së pushtetit, por sepse partia, tek e cila kanë besuar dhe kanë investuar apo më mirë të themi kupola e kësaj partie ka braktisur vendin, ka braktisur shqiptarët. Dhe në këtë mënyrë ka vështirësuar shanset dhe mundësitë edhe për ta, edhe për familjet e tyre. Pra, është fare e qartë se shumica dërmuese e shqiptarëve duan ndryshim dhe këtu përfshihen edhe socialistët e thjeshtë. PROGRAMI EKONOMIK
Në 100 ditët që ju thatë që do të ndryshojë diçka dhe do të lëvizë diçka për mirë për Shqipërinë. Çfarë do të keni parasysh ju që do ta ndryshonit në formë emergjente me t’u bërë Kryeministër i Shqipërisë, siç i keni edhe pritshmëritë?
Po, po. Cili është problemi kryesor që ndodhemi në këtë gjendje? Ka ditë më të qartë për ta thënë këtë se sa dita kur antimafia ka treguar, antimafia italiane se sa i thellë është korrupsioni në Shqipëri? Çfarë na kushton ne më shumë se korrupsioni? Asgjë! 7.2 miliardë euro kjo qeveri ua ka vjedhur shqiptarëve. Masat e para do të jenë ndarja me këtë praktikë. Ndarja e krimit nga politika, lufta kundër korrupsionit do të çlirojë qindra miliona euro, që sot zhduken në xhepat e qeveritarëve dhe klientëve të tyre. Dhe kjo do të mundësojë që ne menjëherë të nisim me platformën tonë ekonomike. Ulja e taksave nuk është thjesht një shifër. Në qoftë se taksa jote, më fal po të drejtohem personalisht, apo e dikujt që ndahet këtu në këtë studio tani apo e atyre që na ndjekin, zbret në 9%, kjo do të thotë më shumë para në xhepat e tu, po kjo do të thotë më shumë para në xhepat e biznesit. Këto para ku shkojnë sot, ku shkon ajo para ekstra që t’i ia paguan me taksën progresive Ramës dhe që nesër do të jetë në xhepat e tu. Bëhet rrugë e re? Jo. Bëhet spital i ri? Jo. Ka pasur rritje pensionesh? Më pak se sa inflacioni. Ka pasur shëndetësi falas? Jo. Ka pasur thithje investimesh dhe të ardhur në trajnim të forcës punëtore? Jo. Ja, pra, ku do të vijë ndryshimi i parë dhe unë po përmend vetëm një aspekt që tashmë është bërë publik, taksa e sheshtë 9%. Më shumë para në xhepat e shqiptarëve, më shumë para për të investuar te biznesi, klimë më e mirë e biznesit, do të sjellë drejtpërdrejt rritje të mirëqenies për të gjithë shqiptarët. Vetëm një element.
PËRGJIMET E ANTIMAFIAS ITALIANE
Është fare e qartë që shqiptarët tashmë kanë 8 vite që shohin të njëjtën gjë. Me të vërtetë këtu po ndërtohen kulla të larta që siç dalin nga përgjimet janë rezultat i bashkëpunimit të mafias italiane me kryebashkiakun, me ministrat, me pushtetarët e lartë nën varësinë e Kryeministrit, janë bashkëpunëtorë të kryeministrit siç ishte edhe Saimir Tahiri, po kështu i zbuluar nga përgjimet e antimafias italiane. Por Shqipëria është vendi me investimet më të ulëta në rajon sa u përket investimeve direkte ndërkombëtare. Kujtoj se kështu ka ndodhur edhe kur antimafia italiane zbuloi çështje tashmë të famshme të trafikut të drogës, të përfshirjes së ish-ministrit të Brendshëm, Tahiri, dhe nuk ka asnjë arsye në botë, pse SPAK-u të mos kërkojë me urgjencë, nga antimafia italiane, nga prokurorët antimafia, që janë kolegët e tyre, fashikujt e këtij hetimi dhe të nisë urgjentisht hetimet, duke marrë këto figura që janë të përmendura në këto hetime menjëherë në shqyrtim, nën hetim dhe duke bërë atë për të cilën SPAK-u është krijuar, për të bërë drejtësi. Natyrisht, drejtësia e vërtetë nuk mund të vijë pa çliruar qeverisjen, kjo është në fakt domethënia e 25 prillit. Ky është një argument më shumë pse 25 prilli duhet dhe do të sjellë ndryshimin e madh për të gjithë shqiptarët. E përsëris, për të gjithë shqiptarët.
Do të garoj në qytetin e Tiranës. Ky qytet më ka besuar për herë të parë përfaqësimin si deputet. Më ka besuar drejtimin si kryebashkiak dhe unë do të garojë në qytetin e Tiranës. Jo, nuk do të garoj në asnjë qark tjetër. Çdo qark do të ketë deputetët e vet dhe drejtuesit e vet. Megjithëse si kryetar i partisë dhe si kandidat për Kryeministër i opozitës së bashkuar, unë do të bëj fushatë në të gjithë vendin, pa diskutim”