“Bashkim me Shqipërinë”, Ministria e Jashtme ruse: Provokim për Ballkanin
“E implikuar në ideologjinë e Shqipërisë së Madhe, që kërcënon drejtpërdrejt integritetin territorial të Ballkanit”
Ministria e Jashtme ruse e ka cilësuar kërcënim për integritetin territorial të shteteve të Ballkanit deklaratën e Ramush Haradinajt për bashkim me Shqipërinë.
Reagimi i Ministrisë së Jashtme të Rusisë u bë përmes Ambasadës së saj në Tiranë. Nëpërmjet një njoftimi në faqen zyrtare të saj, Ambasada ruse në Tiranë ka ashpërsuar tonet në marrëdhëniet diplomatike me shqiptarët. Haradinaj tha se nëse Kosova nuk pranohet nga Bashkimi Europian, ai do të mbajë një referendum për bashkim me Shqipërinë. Duke publikuar deklaratën për mediat të Ministrisë së Punëve të Jashtme të Federatës Ruse, Ambasada thekson se ideja e Haradinajt për mbajtjen e një referendumi për bashkimin ose jo me Shqipërinë është një provokim me qëllim prishjen e stabilitetit politik në Ballkan. Në deklaratën e saj Kosova konsiderohet “një pseudo-shtet i vetëshpallur”, që nuk njihet as nga Serbia, ndërsa ideja e ish-Kryeministrit kosovar si një provokim për idenë e krijimit të “Shqipërisë së Madhe”.
DEKLARATA “Nga komenti i Ministrisë së Punëve të Jashtme të Federatës Ruse për deklaratën e z. R. Haradinaj:
Kohët e fundit një nga politikanët shqiptarë të Kosovës, Ramush Haradinaj, deklaroi se synon të kërkojë mbajtjen e një referendumi për bashkimin e Kosovës me Shqipërinë, nëse ky pseudoshtet i vetëshpallur nuk pranohet sa më shpejt në Bashkimin Europian dhe organizatat ndërkombëtare, si dhe Beogradi nuk do të njohë “pavarësinë” e Kosovës. Këtu po bëhet fjalë për një provokim të radhës, të implikuar në ideologjinë e Shqipërisë së Madhe, e cila kohët e fundit ka përparuar gjithnjë e më intensivisht në rajon dhe kërcënon drejtpërdrejt integritetin territorial të shteteve të Ballkanit. Shantazhi politik është i papranueshëm dhe pikërisht kështu duhet të interpretohet fjalimi i R. Haradinajt, i cili me lehtësi propozon të rishikojë në mënyrë arbitrare kufijtë në Ballkan”, thuhet në deklaratën e Ministrisë së Jashtme të Rusisë. IshKryeministri i Kosovës, Ramush Haradinaj, ka deklaruar se nëse ai i fiton zgjedhjet parlamentare, Kosova do të shkojë në një referendum për bashkimin me Shqipërinë. Sipas Haradinajt,
nëse brenda 5 vitesh nuk do të ketë përparim në çështjet më të rëndësishme të Kosovës, politika e jashtme do të kthente drejtim. “Nëse nuk do të ketë përparim brenda pesë vitesh në Kosovë, nuk kemi me pranu me mbet as konflikt i ngrirë e as nuk kemi me pranu me na nda, por kemi me shku në referendum për bashkim me Shqipërinë!”, shkroi në “Facebook” Ramush Haradinaj.
PËRPLASJA Ky është reagimi i dytë brenda pak ditësh i Ambasadës ruse në Tiranë ndaj Shqipërisë
dhe shqiptarëve. Pak ditë më parë, Ministria e Jashtme e Shqipërisë kërkoi largimin e menjëhershëm të diplomatit Alexey Krivosheev për shkelje në mënyrë të vazhdueshme të masave anti-COVID. Ky vendim pasoi një reagim të fortë nga Ministria e Jashtme e Rusisë, e cila përmes zv.ministrit të saj, Aleksandër Grushko, u shpreh: “Moska është e keqardhur për vendimin e Tiranës zyrtare për të dëbuar një diplomat rus dhe do të kundërpërgjigjet ndaj kësaj lëvizjeje armiqësore, e cila shihet si provokim dhe dëmtuese për marrëdhëniet bilaterale. Sigurisht, ky hap armiqësor nuk do të mbetet pa përgjigje”, tha zv/ministri i Jashtëm rus, Aleksandër Grushko.