Futën mallra kontrabandë nga Rinasi, lirohen nëntë të arrestuarit
Gjykata e Tiranës ka caktuar masën e sigurisë “Detyrim paraqitjeje” për nëntë të arrestuarit për kontrabandë mallrash në Rinas. Arrestimi i tyre u bë në kuadër të operacionit të koduar “Rinas Ekspres”, ndërsa në pranga u vunë shtetasit Byordi Kasmit; Alkida Lazrit; Qani Lazrit, i dënuar më parë për kontrabandë më mallra që i nënshtrohen regjimit doganor; Lonora Legisit dhe Altin Legisit. Në këtë operacion janë arrestuar gjithashtu doganierët Baftjar Kazias, Theodhor Naçi, Muhamet Liçaj, dhe Edlira Saliaj. Ata u arrestuan në flagrancë në rrugën Rinas-Kashar me një sasi mallrash konfeksione pasi kishin kaluar regjimin doganor të Pikës Kufitare Rinas, duke shmangur dhe mosdeklaruar tërësisht detyrimet doganore.
OPERACIONI Operacioni u zhvillua nga Drejtoria Hetimore Qendrore në Departamentin e Policisë Kriminale në Drejtorinë e Përgjithshme të Policisë së Shtetit, në bashkëpunim me Seksionin e Krimit Ekonomiko-Financiar në DVP Tiranë. Nëntë shtetas u arrestuan, nga këta 5 tregtarë dhe 4 doganierë. Në cilësinë e provës materiale u sekuestruan tri automjete që kanë shërbyer për transportin e mallrave të dyshuar kontrabandë pas daljes nga dogana, veshje të ndryshme dhe një sasi aparatesh celularë. Pas hetimeve të kryera më parë dhe informacioneve të grumbulluara u bë e mundur që tregtarët e sipërpërmendur të kapeshin në flagrancë në rrugën Rinas-Kashar, duke transportuar mallra kontrabandë, pasi kishin kaluar regjimin doganor të Pikës Kufitare Rinas, duke mos e deklaruar mallin dhe duke shmangur tërësisht detyrimet doganore. Në cilësinë e provës materiale u sekuestruan sasi të konsiderueshme veshmbathjesh, këpucë, një sasi aparatesh celularë dhe tri automjete që transportonin mallrat kontrabandë.