Rama, replika me Bashën për takimet elektorale
“Dy botë, njëra lufton me virusin, tjetra bën përsheshe me virus”
Mes Kryeministrit Edi Rama dhe Partisë Demokratike nuk munguan dje replikat në distancë në lidhje me grumbullimet elektorale dhe rrezikun e përhapjes së coronavirusit. Duke postuar dy foto, një nga procesi i vaksinimit në sheshin “Skënderbej” të të moshuarve dhe takimit elektoral të Bashës në Fier, ku ai u prit nga qindra simpatizantë të mbledhur e ku u detyrua të hipte mbi kofanonë e makinës së tij për t’i përshëndetur, Rama shkruan se janë dy botë të ndryshme. “DY BOTË – Njëra lufton për të shpëtuar jetën e të gjithëve pa dallim, tjetra bën përsheshe me virus për politikë pa din e as iman…Vazhdon vaksinimi masiv në gjithë Shqipërinë. Vazhdon paralelisht edhe infektimi masiv, për vete hipur mbi makinë, nën këmbë ta hajë kush ta hajë”, shkruan Rama. Por nuk ka munguar reagimi i Partisë Demokratike e cila akuzon kryeministrin se dështoi për 8 vite duke ia shitur Shqipërinë oligarkëve. “Rama ndihet i frikësuar nga qytetarët e Shqipërisë që duan të sjellin ndryshimin që i nevojitet vendit tonë. Ka vetëm dy mundësi: një lider që punon për ju, për të sjellë ndryshimin që i nevojitet Shqipërisë, për t’i përmirësuar jetët tona, ose Rama i cili dështoi për 8 vite dhe ua dha Shqipërinë oligarkëve. Më 25 prill, Shqipëria do të fitojë dhe Rama do të humbë”, thuhet në reagimin e Partisë Demokratike ndaj Kryeministrit. Por Kryeministri replikoi me deklaratën e selisë blu, duke mos kursyer ironinë kur e cilëson kryedemokratin dhëndër që sëmur dasmorët. Kryeministri thotë se Basha mbledh qytetarët duke i rrezikuar nga infektimi i virusit. “O lula unë jam i frikësuar për njerëzit tuaj që i bëni mish për top me grumbullimet e turpshme të papërgjegjshmërisë suaj, duke mbledhur njerëz të verbër me makina e me bori, që virusi të bëjë dasmë teksa dhëndri juaj premton ta bëjë ditën natë! Premtim i mbajtur fatkeqësisht”, shkruan Rama në rrjetet sociale.