Indeksimi, kur nis shtesa për pensionistët
Pavarësisht fushatës dhe kufizimeve të KQZ, pensionistët do të përfitojnë edhe këtë vit indeksimin. Gazeta zbardh sa pritet të jetë rritja mujore që nis nga 1 prilli. Në total, 24 milionë USD
Edhe pse nuk ka ende një vendim të miratuar për indeksimin e pensioneve, efektet pritet që të nisin që prej datës 1 prill, çka do të thotë se bashkë me pensionin e muajit që vjen, pensionistët do të marrin edhe shtesën.
FONDI Këtë vit janë planifikuar 2.4 miliardë lekë apo 24 milionë dollarë, të cilët do të shkojnë për rreth 670 mijë pensionistë që janë në skemë. Në këto kushte, rritja parashikohet të jetë nga 2.5 deri në 3 për qind mbi masën e pensionit. Së paku kjo është ajo që pritet, duke marrë në konsideratë faktin që pas ndryshimit të skemës nuk ka rritje, por vetëm indeksim, bazuar mbi normën e inflacionit. Shtesa e re do të aplikohet për pensionet e plota, ato të pjesshme dhe të reduktuara, pensionet familjare, të posaçme, të invaliditetit, pensionet e ish-ushtarakëve, profesorëve etj. Në tabelë janë të listuara edhe kategoritë përfituese. Vendimi pritet të miratohet në mbledhjen e radhës së qeverisë. Përvoja e viteve të kaluara ka treguar se edhe nëse ndodh të miratohet me vonesë, efektet do të nisin që prej datës 1 prill. Kjo është përcaktuar edhe në relacionin e buxhetit për këtë vit, ku thuhet se “rritja e nivelit të përfitimeve të pensionistëve sipas rritjes së indeksit të çmimeve të mallrave të konsumit dhe të shërbimeve, të përcaktuar në shportën e pensionistëve. Rritja është llogaritur me indeksin mesatar 2.5 % në vit, duke filluar në periudhën 1.04 i çdo viti, duke respektuar kështu edhe fondet e kontigjencës”.
Kujtojmë që një vit më parë, pensionet u indeksuan me 2.3 për qind. Për pensionistët në fshat, pensioni minimal u rrit me 216 lekë, konkretisht nga 9418 lekë që ishte arriti në vlerën e 9634 lekëve dhe ai maksimal nga 13 753 lekë shkoi 14 069 lekë në muaj. Ndërkohë që pragu për të gjitha kategoritë është 28.139 lekë në muaj.
SKEMA Ligji i ri ndryshoi në thelb edhe mënyrën e llogaritjes së pensioneve, duke iu dhënë rëndësi kontributeve të derdhura ndër vite. Këtë vit, për të marrë atë që quhet pension maksimal, si burrat, edhe gratë, duhet të kenë 37 vite e 4 muaj periudhë kontributive.
Lidhur me moshën e daljes në pension, për burrat vijon të jetë 65 vjeç, ndërsa për gratë mosha e daljes në pension është rritur me 2 muaj, përkatësisht nga 61 vjeç që ishte, është bërë 61 vjeç e dy muaj.
Formula përcakton një pension bazë dhe shtesën. Pensioni bazë është 7637 lekë, ndërsa shtesa bazuar në formulën e llogaritjes së pensionit është 1% për çdo vit sigurimi, shumëzuar me bazën mesatare të vlerësueshme, që personat e siguruar kanë arritur nëpërmjet kontributeve të paguara.