Basha takim me të rinjtë: Investitorë nga BE për të rritur punësimin
Kryedemokrati: Do mundësojmë vende pune të mirëpaguara për të rinjtë, duke sjellë investitorët gjermanë, austriakë e britanikë në Shqipëri
Kryetari i Partisë Demokratike Lulzim Basha vijoi dje takimet në qarkun e Korçës, ku u prit nga mbështetës të shumtë duke filluar që nga Pogradeci, ndërsa në Korçë numri i atyre që e prisnin ishte edhe më i madh. Basha e cilësoi një pritje unike atmosferën e krijuar nga të rinjtë.
Basha: Do të mundësojmë që të mos niseni si dikur nga "Lëndina e Lotëve" për t'u larguar nga vendi, por të keni këtu në Korçë mundësinë për t'u kualifikuar në degët që ju preferoni...
Por, para se të zhvillonte një takim me të rinjtë, kreu i PD-së Lulzim Basha u ndal në vendin e njohur si “Lëndina e Lotëve (vendi ku historikisht takoheshin nënat me fëmijët, bashkëshortet me bashkëshortët kur largoheshin për në emigrim)”, në Korçë, ku ndezi një qiri për të rinjtë që janë larguar nga vendi. Ndërkohë, në bashkëbisedimin që pati me ta Basha tha se fatkeqësisht “Lëndina e Lotëve” tashmë nuk është vetëm në Korçë, por në të gjithë portet e Shqipërisë, aeroportin dhe stacionet e linjave ndërkombëtare. “Për fat të keq e ndeza sepse ‘Lëndina e Lotëve’ vazhdon të lotojë për bijat dhe bijtë e Korçës, që vazhdojnë të largohen në emigracion dhe jo vetëm. Në çdo qytet shqiptar ka një lëndinë lotësh, në çdo port të Shqipërisë, në aeroportin e Shqipërisë ka një lëndinë lotësh, në stacionet ndërkombëtare të autobusëve ka lëndina lotësh, njësoj si ajo para 100 apo 200 vjetësh mbulohej nga trishtimi dhe mallëngjimi i familjeve që ndaheshin në dysh”, tha Basha.
AKUZAT
Kandidati për Kryeministër Lulzim Basha akuzoi Kryeministrin Rama se në 8 vite la Korçën njësoj si qytetet e tjera në vend numëro. Sipas kryedemokratit Basha, për kreun e qeverisë qarku i Korçës ka qenë vetëm si një resort për të kaluar fundjavat, por për asnjë moment sipas tij nuk është kujdesur që të sigurojë një arsim më cilësor për ta, mundësi punësimi. Por, kreu i PD-së angazhohet para të rinjve se nëse shqiptarët i besojnë drejtimin e qeverisë pas 25 prillit, ai ka një plan konkret duke filluar nga rritja e mundësive për arsimim më të mirë e deri te krijimi i vendeve të punës të mirëpaguara. “Duke nisur nga fillimi i shtatorit, çdo i ri dhe çdo e re shqiptare do ketë mundësinë që online përmes platformave më të njohura në botë amerikane, të mësojë pa paguar asnjë lekë 5 gjuhë të huaja, anglisht, gjermanisht, italisht dhe spanjisht. Shqiptarët do të zgjedhin vetë se cilën kurs do të ndjekin. Dhe po në bashkëpunim me Aleancën e Universiteteve Europiane, me Komisionin Europian dhe Bashkimin Europian që kanë ndarë për Ballkanin Perëndimor 26 miliardë euro, për të trajnuar rininë e Ballkanit, ku të gjithë po përfitojnë përveç rinisë shqiptare. Sepse qeveritë e të gjitha vendeve po bëjnë punët e tyre, përveç qeverisë në ikje të Edi Ramës. E pra, aspekti i dytë që dua të ndaj sot me ju, është po kështu si fillim online, pastaj përmes një kampusi të kombinuar, të pesë apo gjashtë universitete europiane, qeveria ime do të ofrojë 20 trajnime profesionale për rininë shqiptare në fusha nga teknologjia e informacionit dhe programimi, tek inxhinieritë dhe profesionet që kanë të bëjnë me prioritetet tona të zhvillimit ekonomik, siç janë turizmi, siç janë arkitektura, siç janë degë të tjera për të cilat kanë nevojë të madhe tregu i punës i Europës”, vijoi Basha. INVESTIMET E HUAJA
Basha angazhohet se do të rrisë vendet e punës në Shqipëri. Dje në Korçë ai tregoi se duke krijuar një klimë të favorshme për biznesin dhe punonjësit e trajnuar e bëjnë Shqipërinë një potencial të madh për të tërhequr biznese gjermane, amerikane dhe britanike që të investojnë në Shqipëri. “Kështu pra, do të rikthejmë zhvillimin ekonomik në qendër të vëmendjes, kështu do të mundësojmë që të mos niseni si dikur nga ‘Lëndina e Lotëve” për t’u larguar nga vendi, por të keni këtu në Korçë mundësinë për t’u kualifikuar në degët që ju preferoni, të keni këtu në Korçë investime gjermane, italiane, angleze, amerikane, europiane të cilat duke parë aftësitë e rinisë shqiptare dhe klimën e biznesit që ne do të sjellim me taksën e sheshtë, heqjen e taksës Rama mbi naftën, uljen e çmimeve të çmendura që nuk krahasohen me asnjë vend tjetër të rajonit, ta kuptojnë që në të gjithë këtë Ballkan ku kanë hedhur sytë për të investuar, ka një vend që është më i miri, më i bekuari, më i gatshmi, kjo është Shqipëria jonë e dashur”, tha Basha.