Rama insiston: Merrni punëtorë nga Bangladeshi dhe Afganistani

“Vetëm 7 ditë është procedura për të marrë punonjës nga vendet e huaja dhe i ke ‘pronto’ e s’dinë as shqip dhe të bëjnë thashetheme”

Në një kohë kur Shqipëria renditet në krye të vendeve ku shtetasit e saj kërkojnë azil ekonomik në vendet e BE-së, madje më tepër edhe se vendet e treta që janë në luftë, Kryeministri Rama insiston që të lejojë në Shqipëri emigrantë për t’i zëvendësuar.

Dje Kryeministri Rama ishte në një biznes fason në Shkodër ku pronari i biznesit u ankua se nuk gjen punonjës në Shqipëri për t’i punësuar. Ndërkohë, nga ana tjetër, kreu i qeverisë Rama i dha opsionin që sipërmarrësi të marrë punonjës nga Bangladeshi apo Afganistani. Sipas kreut të qeverisë, ata janë edhe më të mirë, pasi nuk dinë shqip dhe nuk merren me thashetheme. “Unë e di që kjo është bisedë e rrezikshme për mua, sepse kur e them unë, neve na hidhen në fyt e na thonë se kjo nuk është punë por është skllavëri. Ne kemi kaluar tashmë ligjin e ri për të huajt, që është shumë i thjeshtë. 7 ditë është procedura për të marrë punonjës nga vendet e huaja, nga Bangladeshi, nga Afganistani. Dhe i ke pronto dhe s’dinë as shqip dhe të bëjnë thashetheme. Kur të mësojnë shqip, ndërroi, se bëjnë thashetheme”, tha Rama.

AKUZAT Ndërkohë Kryeministri Edi Rama sulmoi dje nga Shkodra Partinë Demokratike dhe kryetaren e Bashkisë, Voltana Ademi, se mbajnë peng Shkodrën nën luftën antikomuniste. Gjatë një takimi elektoral në Shirokë, Rama u shpreh se Bashkia e Shkodrës është një bashki qorre dhe shembulli më drithërues i injorancës dhe prapambetjes. Teksa e cilësoi Shkodrën qytetin më të pisët në Shqipëri, Rama thekson se kryebashkiakes Ademi nuk i prishet fare terezia që plehrat nuk mblidhen. “Na ka ngec sharra në gozhdë, se këtu është një lloj gozhde që s’ka sharrë që i bën derman. Është një lloj gozhde e ngulur në tru, që e than dhe e than trurin. Ata e kanë mendjen tapë. Nuk dua të shfajësohem, se ne kemi borxhe ndaj Shkodrës, e cila është pjesë e pandashme e gravitetit të historisë sonë, kulturës e traditës sonë. Shkodra është një potencial i jashtëzakonshëm. Nuk kanë më shumë se Shkodra ato qytete që sot janë në proces të pakthyeshëm transformimi, madje ka më shumë Shkodra. Unë jam këtu sot për t’iu thënë shkodranëve se nëse duan të na japin mundësinë të shlyejmë borxhet tona, të na japin mbështetje. Për të mbështetur Shkodrën ne u kemi ardhur vërdallë kufijve të vendosur nga një bashki qorre, që është shembulli më drithërues i injorancës, prapambetjes, inercisë, duke shkuar qorrazi drejt së ardhmes. I kemi ardhur rrotull dhe kemi ndërtuar rrugën Shkodër-Velipojë, një rrugë turistike që ishte një premtim denbabaden i të gjitha herëve që PD-ja ka ardhur këtu për të marrë votën dhe që nuk u ndërtua kurrë. E ndërtuam ne, duke i ardhur rrotull se nuk merrnim dot leje në bashki”, tha Rama. Sipas tij, kryetares së Bashkisë nuk i bëhet vonë se Shkodra është bërë qyteti më i pistë i vendit. “Ata duan ta mbajnë Shkodrën në këtë gjendje. Komunizmi ka vdekur dhe mban peng vetëm Shkodrën, nga këta që e përdorin komunizmin për të marrë peng gjithë Shkodrën. Nuk mundet dot ti të shkosh të votosh, sikur shkon për të bërtitur në stadium ditën e diel, se të hënën dita vazhdon. Dhe kur ti ia jep votën një idioti, je peng i tij. Shkodra ka mbetur peng e një idiotësie prej 30 vitesh, me idenë se po i reziston komunizmit, që ka vdekur dhe që s’ka asnjë shans të ringjallet, por rri gjallë në formën e fantazmës këtu në Shkodër. Nuk i prishet fare terezia asaj kryetares së Bashkisë se çfarë ndodh me plehrat. Shkodra është qyteti më i pistë, ku nuk mblidhen plehrat. Është qyteti me më shumë gropa në vend. Këtu është qytet që ka mbetur ora. Por punët e veta edhe kryetarja e Bashkisë, edhe ata të shpurës së PD-së, që venë e vinë sa këtu, sa në Tiranë për të bërë deputetin e Shkodrës, i kanë në terezi. Lufta që bëjnë sot është prapë për punët e tyre, jo për punët e Shkodrës apo të Shqipërisë”, tha Rama.