Meta: Largimi i “trurit” e rinisë, koha të ndalim shpopullimin

Presidenti i Republikës ka ripërsëritur për të disatën herë qëndrimin e tij për problemin e madh të largimit të shqiptarëve nga vendi. Teksa ka komentuar gjetjet e Institutit për Studime Ekonomike Ndërkombëtare të Vjenës, kreu i shtetit e ka konsideruar largimin e të rinjve dhe trurit, si një plagë të madhe të vendit. Meta thotë se sipas studimi,t fenomeni i shpopullimit të vendit është shtuar gjatë viteve të fundit. Përmes një mesazhi në “Facebook”, Presidenti saktëson se largimi i të rinjve, të grupmoshës 2024 vjeç është përkeqësuar. “Largimi i trurit dhe i rinisë është një plagë e madhe për vendin. Një tjetër institucion prestigjioz, Instituti për Studime Ekonomike Ndërkombëtare i Vjenës, bën me dije se fenomeni i shpopullimit në Shqipëri, gjatë viteve të fundit është përkeqësuar sidomos me largimin e grupmoshave 20-24 vjeç”, shkruan Meta. Kreu i shtetit i bën apel institucioneve shtetërore që të krijojnë shpresë, alternativa dhe mundësi për të rinjtë dhe njerëzit e arsimuar për të ndalur largimin e tyre. Presidenti vë në dukje se tani është koha për të ndalur shpopullimin, duke theksuar se vendi ka nevojë për të “fitim truri” dhe jo “ikje të trurit”. “Studimi vëren se nga 105 mijë qytetarë që ikin nga Shqipëria, 40,700 persona janë të arsimuar ose 40 për qind e totalit. Largimi i trurit dhe i forcave të reja dhe më krijuese të shoqërisë duhet ndalur sa më parë. Të rinjve tanë u duhen ofruar më shumë shpresë, alternativa edukimi dhe punësimi, ndërsa të arsimuarve më shumë shanse të barabarta, vlerësim meritokracie dhe vende pune, ku të shfaqin talentin dhe potencialin e tyre intelektual. Shqipëria ka nevojë për ‘braingain’ dhe jo ‘braindrain’! Koha për të ndalur shpopullimin është tani!” shkruan Meta. Prej disa muajsh kreu i shtetit ka ndërmarrë një fushatë të gjerë në media për ndalimin e shpopullimit. Thuajse në çdo dalje publike, Presidenti Meta vë në dukje shifrat e larta të largimit të shqiptarëve, veçanërisht të rinjve të cilat publikohen nga studime ndërkombëtare. Kjo fushatë sipas kreut të shtetit po bëhet për të zvogëluar shifrat e ikjeve, përmes apeleve drejtuar institucioneve që të krijojnë më shumë mundësi dhe hapësira arsimimi dhe punësimi në vend me qëllim, për të ndalur këtë fatkeqësi kombëtare.