Blinken i kërkon Vuçiçit që Serbia të njohë Kosovën
Vuçiç: Pa llogaritur njohjen, letra nga Blinken ishte e mirë
Sekretari Amerikan i Shtetit, Antony Blinken, i dërgoi një letër Presidentit të Serbisë, Aleksandar Vuçiç, në të cilën ai ka shkruar me dorë një mesazh të veçantë nën pjesën zyrtare të letrës, që në fakt ishte pjesa më e rëndësishme e saj.
Në atë shkrim raportohet se ai i kërkoi Presidentit Vuçiç njohjen reciproke me Kosovën, sipas gazetës “Novosti”. “SHBA-ja është e përkushtuar për marrëdhëniet tona afatgjata. Ne ndajmë vizionin e një Serbie demokratike, të qëndrueshme, prosperuese dhe demokratike në hapat drejt anëtarësimit në BE. Qëllimi afatgjatë i SHBA-së ka qenë ta shohë Serbinë dhe Kosovën të arrijnë marrëveshje gjithëpërfshirëse të përqendruar në njohjen reciproke”, shkruan Blinken në letrën dërguar Vuçiçit. “Unë i mbaj ndërmend plotësisht bisedat tona të mira dhe po pres me padurim rinovimin e tyre”, shkruan Blinken me stilolaps në fund të letrës, e cila u dërgua më 23 shkurt, si përgjigje falënderimi për Vuçiç ndaj urimit të Presidentit të Serbisë për emërimin si Sekretar i Shtetit. Letrën nga Blinken, Vuçiç e zbuloi një ditë më parë, duke vlerësuar se “duke mos llogaritur historinë e njohjes reciproke me Kosovën”, mesazhi ishte “kuptimplotë dhe i mirë” në të gjitha aspektet e tjera, për të cilat ai e falënderoi Blinken. “Unë e përgëzova atë për emërimin në një pozicion të rëndësishëm në Shtetet e Bashkuara dhe besoj se ai gjithashtu kujtoi bashkëpunimin tonë. Ai madje shkroi diçka me dorën e tij, kështu që ky është një lajm i rëndësishëm”, tha Vuçiç. Në shkurt, Presidenti i SHBA-së, Joe Biden, i kujtoi Presidentit serb qëllimin e Amerikës për dialogun Kosovë–Serbi, praktikisht njohjen reciproke.
Në çdo dalje publike dhe politike Vuçiç e ka kundërshtuar njohjen e pavarësisë së Kosovës. Një gjë të tillë bëri edhe në fjalimin e tij të fundit përpara Parlamentit Europian. Vuçiç kërkon pakt me Kosovën, por nuk pranon “që Serbia të japë pa marrë asgjë në këmbim, ndërsa një palë (Kosova) fiton gjithçka”. Bisedimet mes Kosovës e Serbisë kanë ngecur në pritje të zgjedhjes së plotë të institucioneve të reja në Kosovë dhe vendimit të Kryeministrit të ri, Albin
Kurti, se nuk do të nisë të bisedojë me palën serbe, pas katër kushteve të vendosura prej tij për uljen në të njëjtën tryezë me përfaqësuesit e Serbisë, kushte të cilat, për të qenë realistë, janë të merituara për Kosovën, por shumë të vështira për t’u pranuar nga Serbia.