Vuan me San Marinon, Manaj-Uzuni ngjisin Shqipërinë në pod

Beratasi dhe Roshi ndryshojnë lojën, kuqezinjtë lënë pas Poloninë

Shqipëria merr 3 pikët e radhës në San Marino dhe në bazë të kalendarit, ngjitet e treta duke lënë Poloninë pas.

Një pjesë e parë standard, me skemën 3-5-2, pa shpejtësi, pa fantazi, pa forcë sulmuese dhe rreziqe konkrete. Ndërsa në të dytën, Uzuni dhe Roshi i sollën tjetër fytyrë skuadrës sonë kuqezi. Ishte Manaj që gjeti golin e parë me kokë në minutën e 63-të pas asistit të Uzunit, ndërsa ky i fundit vulos fitoren 0-2 me devijim në të 85’-tën. TAKTIKË STANDARDE

Edi Reja vijon me formatin standard 3-5-2, kur edhe dy anësorët janë Hysaj dhe Lenjani, lojtarë tipikë me tipare mbrojtëse, pavarësisht se përballë është skuadra e vendit të fundit në FIFA. Gjimshiti, Veseli kanë në krah të rikthyerin pas më se dy vitesh, Ajetin në qendër. Përpara tyre, Ramadani në qendër dhe Bare majtas e Laçi djathtas. Broja dhe Manaj në sulm, por që furnizohen shumë pak. Përballë është San Marino, që mbrohet me forca të shumta dhe asnjëherë e rrezikshme mbi vijën e mesit të fushës.

PJESA E PARË Shqipëri e ngadaltë. Skuadra kuqezi ka gjithçka në kontroll, zotërimin e topit dhe iniciativat për të ndërtuar, por kuqezinjtë mbajnë topin më tepër sesa duhet në këmbë, janë shumë të ngadaltë në veprime dhe ndërtojnë pak për të furnizuar dyshen Broja-Manaj. Manovra në ndërtim e skuadrës sonë është shpesh e pakuptueshme, përveçse shumë e lexueshme për pikën e vetme të pasimit që gjendet gjithmonë te lojtari pas shpinës dhe jo me vertikalizim përpara. Duhet të kalojnë 14 minuta që Bare dhe Manaj, me kombinime të bukura nga e majta, nxjerrin në moment goditjeje Hysajn, në hyrje të zonës që dërgon të parën tentativë në kuadratin e portierit Benedetini. Minutat kalojnë dhe Shqipëria bën shumë pak. Në të 25’-tën Qazim Laçi ka të vetmen mundësi që të gjuajë nga jashtë zonës, por mbi tra. Refreni është i njëjtë, Gjimshiti mundohet të hapë lojën nga e majta në të djathtë, por Ramadani dhe Laçi para tij nuk bëjnë si duhet filtrimin për të furnizuar dyshen BrojaManaj. Ky i fundit provon nga një goditje dënimi, por vetëm forcë dhe përplasje në mur. Lenjani hedh krosimet më të sakta nga e majta, por në dy raste dalin Hysaj dhe Laçi në pozicion goditës, që nuk fitojnë dot duelin në ajër. Ky fraksion mbyllet me rrjeta të paprekura...

PJESA E DYTË Reja e kupton për vetëm 40 sekonda që çoi dëm pjesën e parë me zgjedhjet që kish bërë. Kaq sekonda dhe Uzuni i sapofutur bashkë me Roshin në vend të Brojës dhe Ramadanit gjuan drejt portën me rastin e parë të rrezikshëm. U deshën 61 minuta deri në tentativën e parë në portë për Strakoshën, një gjuajtje qendrore në duart e gardianit kuqezi. Pak minuta më vonë, Hysaj dhe Roshi kanë një tentativë, pa ia dalë. Në të 63’-tën Uzuni asiston me një krosim të saktë dhe Rei Manaj në qendër me kokë shënon. Më në fund Shqipëria zhbllokohet dhe kalon në avantazh. Më tej Uzuni dhe Ramadani bëjnë tentativat e radhës, por i pari ndalet nga portieri dhe i dyti gjuan keq mbi tra. Shqipëria ndryshon marsh, bëhet më sulmuese e më e rrezikshme. Manaj dhe Hysaj do të godasin shtyllën, por i pari në pozicion jashtë loje, ndërsa kapiteni vërtet i pafat. Goli i dytë vjen sërish me ndihmën e traversës. Gjimshiti godet me kokë dhe sfera ndalet në traversë, më pas është një tentativë drejt portës që devijohet nga Uzuni, i cili gjen golin e dytë me Kombëtaren.

Shqipëria siguron 3 pikët e radhës dhe i gëzohet përkohësisht kalendarit, pasi lë pas Poloninë.