Rama, akuza Bashës për takimet masive me elektoratin:
“Lus Zotin që të mos përfundojnë spitaleve për mollaqet e Lulzimit”
Kryeministri Edi Rama reagoi edhe dje me një postim në rrjetet sociale për takimin elektoral të kryedemokratit Lulzim Basha në Korçë, ku në takimin me të rinjtë nuk ishin respektuar rregullat anti-COVID. Rama thotë se qytetarët që dalin në takimet e kryedemokratit, duke u grumbulluar pa respektuar masat e distancimit social, rrezikojnë shëndetin “për interesin mizerabël të një fushate edhe më mizerabël, me makina, bori, zhurmë e turmë, duke bërë përshesh në çdo shesh”. Por për këto grumbullime, Rama ngre gishtin e “fajit” edhe mbi kreun e PD-së, Lulzim Basha, dhe thotë se kjo “është një djallëzi prej njerëzish pa vizion, pa karakter, pa përgjegjësi e as fije njerëzillëku”. “Të gabosh është njerëzore, të këmbëngulësh në gabim është djallëzore”, thoshin latinët. Kjo këmbëngulje prej shejtanbudallai në fajin e kërcënimit të shëndetit të njerëzve për interesin mizerabël të një fushate edhe më mizerabël, me makina, bori, zhurmë e turmë, duke bërë përshesh në çdo shesh, është një djallëzi prej njerëzish pa vizion, pa karakter, pa përgjegjësi e as fije njerëzillëku. Sot në Tiranë, ku vazhdon vaksinimi masiv e në Korçë, ku u krye një tjetër faj i shëmtuar infektimi masiv. “Lus Zotin që për dy a tri javë që i duhen virusit të kapë rrugët e frymëmarrjes, këta njerëz të verbër e të keqpërdorur, të mos përfundojnë spitaleve për mollaqet e Lulëzimit e për mustaqet e Saliut”, shkruan Kryeministri. Por edhe dje gjatë procesit të vaksinimit në sheshin “Skënderbej” në Tiranë, nuk ka munguar kaosi, ku grupe të moshuarish kanë dashur të vaksinohen dhe pse të tjerë mbanin radhët, duke krijuar një situatë aspak normale, ndërsa Kryeministri ka publikuar foto nga çadra si të ishte repart ushtarak, ku nuk prishej as vija e drejtë. Por, Partia
Demokratike reagoi ndaj statusit të Kryeministrit, të cilin e sheh se është në panik nga pritja e madhe që qytetarët i bëjnë kreut të opozitës. “I kapur mat në panikun e humbjes, Edi Rama shqetësohet çdo ditë për mikpritjen e shqiptarëve për Lulzim Bashën. Edi Rama e ka kuptuar që shqiptarët duan ndryshimin dhe askush nuk e ndal dot më këtë. Humbja e zgjedhjeve e ka bërë nervoz dhe për këtë ai sulmon takimet tona elektorale. PD-ja është parti që funksionon sipas rregullave dhe ligjeve në fuqi. Kërcënimet dhe keqinformimet e Edi Ramës nuk e ndalojnë dot rrugën drejt fitores së Partisë Demokratike. Në 25 prill Rama do të humbë dhe Shqipëria do të fitojë”, përfundon reagimi i Partisë Demokratike.